Ka shkuar në 39 numri i viktimave nga tërmeti vdekjeprurës në Turqi. Sipas të dhënave zyrtare të autoriteteve numri i të plagosurve është më shumë se 1600 persona. Tërmeti me madhësi 6.8 me qendër në qytetin Sivrice në provincën Elazig bëri që disa ndërtesa të shemben.
Dyzet e pesë njerëz janë shpëtuar deri tani, ndërsa sipas autoriteteve janë më shumë se 20 persona nën rrënoja. Tërmeti i të premtes në Turqi u ndje edhe në Siri, Liban dhe Iran. Tërmetet janë të zakonshme në Turqi. Rreth 17,000 njerëz kanë humbur jetën nga një tërmet masiv në qytetin Izmit, më 1999.
Ministri i Brendshëm Süleyman Soylu nuk mundi t’i mbante lotët kur po tregonte rastet e ceremonive mortore të të vdekurve nga tërmeti. “Dy gjëra nuk më hiqen nga mendja. Funerali i një vullnetari, nga ana tjetër, funerali i 2 vëllezërve të vegjël që u futën në të njëjtën arkivol. Nuk mund t’i harroj”.
Ai gjithashtu tregoi rastin e një babai që lutej për foshnjën e tij të ngelur në rrënoja. “Dëshpëruese! Nën rrënojat, fjalët e babait:’Kushdo që të jesh, shpëto foshnjën time 2 muajshe”. Kujtojmë që bilanci i të vdekurve është 39 dhe personat që u nxorën të gjallë janë 45 pas tërmetit të mbëmjes së premte në Turqi.