Zyrtarë të lartë izraelitë kanë paralajmëruar diplomatët amerikanë se çdo protestë masive në Iran do të përballet me shtypje të ashpër. Kjo deklaratë nga Teherani erdhi pasi Tel Avivi bëri thirrje publikisht për një kryengritje popullore, shkruan “The Washington Post”.
Regjimi ka kryer dhunë ndaj protestuesve në fillim të këtij viti, duke vrarë mijëra gjatë protestave antiqeveritare. Zyrtarët izraelitë ”duket se shpresojnë për një kryengritje popullore” dhe po i kërkojnë Shteteve të Bashkuara të jenë të gatshme të mbështesin protestuesit. Ekspertja e Iranit, Narges Bazogli, beson se qëndrime kontradiktore do të forcojnë mosbesimin e iranianëve ndaj Izraelit, duke vënë në dukje se “shumë do të ndihen të tradhtuar”.
Nga ana e saj, ambasada izraelite në Uashington deklaroi se vendi është i përqendruar në “neutralizimin e aftësive ushtarake të regjimit”, duke shtuar se ka grupe opozitare që kanë vepruar prej vitesh. Konflikti tashmë ka çuar në mijëra sulme brenda territorit iranian, duke synuar objektet bërthamore, rezervat e raketave balistike dhe forcat e sigurisë së brendshme. Në një fjalim televiziv, kryeministri izraelit Benjamin Netanyahu tha se vendi i tij kërkon të krijojë kushtet që “populli i guximshëm iranian të heqë dorë nga regjimi”.
Zyrtarë të tjerë izraelitë duket se e shohin dobësimin e Iranit si një sukses edhe pa një kryengritje. “Çdo ditë që dobësojmë këtë regjim është një fitore”, tha Ze’ev Elkin. Analistët paralajmërojnë për rreziqet me të cilat do përballen protestuesit e paarmatosur. Susan Maloney e Institutit Brookings vuri në dukje se “populli iranian është në rrezik të madh” dhe paralajmëroi kundër përdorimit të tij si “gur shahu” në ndjekjet gjeopolitike.
Qëndrimi i administratës Donald Trump duket se ka ndryshuar, pasi fillimisht u bëri thirrje iranianëve të përmbysin regjimin, ndërsa tashmë e evidenton rrezikun e vrasjeve masive nga forcat e sigurisë. “Ata kanë njerëz në rrugë me mitralozë”, tha Trump. Zyrtarët izraelitë besojnë se çdo ndryshim do të vijë vetëm nga brenda. Në të njëjtën kohë, tensioni po përhapet në rajon, me Iranin që vazhdon të mbështesë organizata të tilla si Hamasi, Hezbollahu dhe Huthitët. Analistët theksojnë se strategjia e Izraelit është pjesë e një përpjekjeje afatgjatë për të destabilizuar Republikën Islamike.