Tragjedi në Kaliforni, makina përplas këmbësorët në Oakland, tre viktima dhe disa të plagosur

Sipas raportimit të Associated Press, tre persona humbën jetën dhe disa të tjerë mbetën të plagosur pasi një shofer përplasi disa automjete dhe këmbësorë vonë mbrëmjen e së shtunës në Oakland.

Ngjarja tragjike ndodhi pak pas orës 23:00, ndërsa ekipet e emergjencës dhe policia mbërritën menjëherë në vendin e aksidentit. Sipas Oakland Fire Department, tre persona u shpallën të vdekur në vendngjarje, ndërsa pesë të tjerë pësuan lëndime të ndryshme. Dy prej të plagosurve ndodhen në gjendje kritike dhe po marrin trajtim intensiv mjekësor.

Edhe shoferi i përfshirë në aksident mbeti i plagosur, por autoritetet bënë të ditur se dëmtimet e tij konsiderohen të lehta. Deri tani, identiteti i drejtuesit të mjetit nuk është bërë publik dhe hetuesit nuk kanë dhënë ende detaje mbi shkaqet që çuan në këtë përplasje fatale.

Autoritetet lokale kanë nisur një hetim të plotë për të zbardhur rrethanat e aksidentit, ndërsa ngjarja ka tronditur komunitetin e Oakland-it dhe ka rikthyer vëmendjen mbi sigurinë rrugore dhe rrezikun e aksidenteve urbane gjatë orëve të natës.

AV/KJ