Trupat e katër zhytësve italianë që u zhdukën pas një aksidenti zhytjeje në Maldivet janë gjetur, konfirmon Ministria e Jashtme e Italisë.
Sipas autoriteteve, trupat u gjetën brenda një shpelle rreth 60 metra të thellë në Atollin Vaavu, gjatë një operacioni kërkimi për rreth tre orë nga ekipe të specializuara zhytësish nga Finlanda dhe Maldivet.
Një trup tjetër, i një prej pesë anëtarëve të grupit, ishte gjetur më herët pas incidentit që ndodhi të enjten.
Autoritetet bëjnë të ditur se gjatë operacionit të kërkim-shpëtimit humbi jetën edhe një zhytës shpëtimi, i cili po merrte pjesë në kërkimin e trupave të zhytësve italianë.
Pesë italianët humbën jetën teksa eksploronin shpella nënujore në një thellësi prej rreth 50 metrash.
Katër nga viktimat italiane ishin pjesë e një ekipi të University of Genova, përfshirë profesoreshën e ekologjisë Monica Montefalcone, vajzën e saj Giorgia Sommacal dhe dy studiues të tjerë. Viktima e pestë ishte instruktori i zhytjes Gianluca Benedetti.
Grupi kishte hyrë në ujë të enjten e kaluar nga jahti “Duke of York”, por u raportua i zhdukur pasi nuk doli më në sipërfaqe.