Presidenti amerikan, Donald Trump thotë se do të dëshironte të arrestonte guvernatorin e Kalifornisë, Gavin Newsom. Trump mësohet se ka folur me gazetarët ndërsa po kthehej në Shtëpinë e Bardhë, ku është pyetur rreth gjendjes në qytetin kalifornian të Los Angelesit.
Trump u pyet lidhur me faktin që Newsom kishte sfiduar autoritetin e tij dhe se a do të duhej ta arrestonte “shefi i kufirit”. “Do të duhej ta bënte”, tha shkurtimisht Trump. I menjëhershëm ka qenë reagimi i guvernatorit të Kalifornisë, i cili në rrjetin social X teksa ka postuar videon e shkurtër të Trump para mediave, ku shkruan se ky është një hap drejt autoritarizmit.
“Presidenti i Shteteve të Bashkuara sapo bëri thirrje për arrestimin e një guvernatori në detyrë. Kjo është një ditë që shpresoja të mos e shihja kurrë në Amerikë. Nuk ka rëndësi nëse je Demokrat apo Republikan – kjo është një vijë që nuk mund ta kalojmë si komb. Ky është një hap i qartë drejt autoritarizmit”, shkruan guvernatori i Kalifornisë Gavin Newsom. Protestat filluan të premten pasi u zbulua se oficerët e Zbatimit të Doganave të Imigracionit (ICE) po kryenin bastisje në të gjithë qytetin.
