Trump kërcënon udhëheqësin suprem të Iranit: Kujdes kur më krahason me një klloun

“I ashtuquajturi Lideri Suprem, i cili nuk ka qenë aq suprem kohët e fundit, ka thënë gjëra të këqija për Shtetet e Bashkuara dhe Europën. Ekonomia e tyre po shkon drejt greminës dhe njerëzit e tyre po vuajnë. Duhet të jetë shumë i kujdesshëm me fjalët.”

Me këto fjalë Presidenti amerikan Donald Trump sulmoi përmes Twitterit Ayatollah Ali Khamenei-in, i cili gjatë namazit të së Premtes në Teheran i quajti SHBA “terroristë”.

Në fakt, disa orë pasi ushtria amerikane pranoi plagosjen e 11 ushtarëve në sulmin e kryer nga Pasdaran në dy bazat amerikane në Irak, autoriteti më i lartë i Republikës Islamike kujtoi se “hakmarrja” për atë që ai e quajti ‘vrasja frikacake e gjeneralit’ të Rojeve Revolucionare të Iranit, të cilin, sipas tij amerikanët nuk mundën ta vrisnin në ‘fushën e betejës’, nxorri lakuriq imazhin e SHBA si superfuqi.

Khamenei e quajti Donald Trump një “klloun” dhe se si pretendon se mbështet popullin iranian, por më pas “e godet atë me një kamë helmuese”, duke kujtuar përkrahjen e shprehur hapur nga presidenti amerikan për protestuesit antiqeveritar, madje me një postin në tweet në gjuhën Farsi.

Dje Khamenei në vazhdën e sulmeve ndaj SHBA, tha gjithashtu se “Marrëveshja bërthamore është një mashtrim”, dhe se “Gjermania, Franca dhe Mbretëria e Bashkuar” janë vende që i shërbejnë Shteteve të Bashkuara. ‘Ata- tha lideri iranian- mbajnë doreza mëndafshi ndërsa fshehin brenda duar të hekurta.”

Khamenei sulmoi 3 shtetet europiane për vendosjen e barrierave për pasurimin e uraniumit nga ana e Iranit dhe zgjidhjen e mosmarrëveshjeve pas shkeljes së marrëveshjes bërthamore nga Republika Islamike, e cila ishte zotuar të ngadalësojë procesin pasurimit.

“Gjatë luftës me Irakun, Gjermania furnizoi Sadamin me armë kimike, Franca i dërgoi atij helikopterë për të synuar cisternat e naftës iraniane dhe Britania e Madhe ishte në shërbim të tij me të gjitha mënyrat”, tha Khamenei në predikimin e tij.

Nuk ka mbetur pas Ministri i Jashtëm Iranian Hasan Rouhani i cili para pak ditësh, në lidhje me marrëvershjen bërthamore, tha se “Me sanksione e reja të mundshme, ushtarët europianë në rajonin e Lindjes së Mesme do të jenë në rrezik”, dhe se “ata duhet të tregohen të zgjuar, të largohen nga rajoni me paqe dhe jo me luftë”.

Mbretëria e Bashkuar, Gjermania dhe Franca, të cilat kanë nënshkruar marrëveshjen bërthamore, akuzojnë Iranin për shkelje të paktit ndërsa procesi mund të çojë në sanksione të reja të OKB gjë e cila me shumë gjasa do ta dobësonte Teheranin në ndeshje kundër Shteteve të Bashkuara.