Presidenti i Shteteve të Bashkuara, Donald Trump, deklaroi se nuk është i shqetësuar nga mundësia e ndërprerjes së negociatave me Iranin, teksa tensionet në Lindjen e Mesme vijojnë të shtohen dhe tregjet ndërkombëtare po reagojnë me luhatje të ndjeshme të çmimeve të naftës.
Në një intervistë për CNBC, Trump minimizoi rëndësinë e raportimeve për pezullimin e komunikimeve indirekte mes Uashingtonit dhe Teheranit, duke u shprehur se zhvillimet nuk ndikojnë në qëndrimin e tij.
“Nuk më intereson nëse kanë përfunduar, sinqerisht. Vërtet nuk më intereson. Nuk më intereson aspak”, deklaroi presidenti amerikan, duke komentuar informacionet që sugjerojnë një ndërprerje të kontakteve diplomatike mes palëve.
Trump u ndal edhe te tregu energjetik, duke hedhur poshtë shqetësimet për rritjen e çmimeve të naftës si pasojë e tensioneve rajonale. Sipas tij, çmimet pritet të pësojnë rënie në të ardhmen e afërt.
“Mendoj se nafta do të bjerë si shkëmb në një distancë shumë të afërt”, tha ai.
Ndërkohë, sipas agjencisë iraniane të lajmeve Tasnim, Irani ka pezulluar komunikimet indirekte dhe negociatat me SHBA-në përmes ndërmjetësve. Raportohet se vendimi është marrë si reagim ndaj sulmeve të Izraelit në Liban, zhvillim që mund të ndikojë më tej në klimën e tensionuar të rajonit.