Trump paralajmëron Hamasin: Nëse nuk respekton paqen, fundi do të jetë i hidhur

Presidenti amerikan Donald Trump ka paralajmëruar Hamasin se nëse nuk respekton marrëveshjen e paqes,  do të përballet me pasoja të ashpra. Në një postim në platformën “Truth”,  Trump tha se aleatë të SHBA-së në Lindjen e Mesme janë të gatshëm të ndërhyjnë në Gaza, por ai i ka ndaluar për momentin, përfshirë edhe Izraelin.

“Nëse nuk e bëjnë,  fundi i Hamasit do të jetë i shpejtë,  i tërbuar dhe brutal,”  shkroi Trump.

Ai theksoi se ekziston ende shpresë që Hamasi të veprojë drejt dhe të respektojë paqen,  duke shtuar se ka ndaluar ndërhyrjen e aleatëve për shkak të kësaj mundësie.

Trump përshkroi një atmosferë pozitive në rajon,  duke e cilësuar si një moment historik:

“Dashuria dhe fryma për Lindjen e Mesme nuk janë parë kurrë në një mijë vjet. Është një gjë e mrekullueshme për t’u parë!”

Ai tha se u ka kërkuar vendeve aleate dhe Izraelit të presin,  duke besuar se Hamasi mund të zgjedhë rrugën e paqes.

Në fund të postimit,  presidenti amerikan falënderoi të gjitha vendet që kanë shprehur gatishmërinë për të ofruar ndihmë në rajon,  duke e cilësuar këtë si një akt solidariteti dhe përgjegjësie.