Trump po përgatitet për një bllokadë të zgjatur ndaj Iranit

“Presidenti i SHBA-së, Donald Trump u ka dhënë udhëzime ndihmësve të tij që të përgatiten për një bllokadë të zgjatur ndaj Iranit”, kështu shkruan gazeta amerikane The Wall Street Journal. Në takimet e fundit Trump u duk i vendosur të vazhdonte presionin mbi ekonominë iraniane dhe eksportet e naftës, duke bllokuar transportin detar për në dhe nga portet e vendit.

SHBA-të po bllokojnë anijet që shkojnë në ose nga portet iraniane, duke u përpjekur ta privojnë vendin nga të ardhurat nga nafta, ndërsa Irani po bllokon gjithashtu kalimin nëpër ngushticë. Më herët të martën, Trump tha se Irani i kishte kërkuar Shteteve të Bashkuara të heqin bllokadën detare të ngushticës, ndërsa të dyja palët vazhdojnë negociatat për t’i dhënë fund luftës dy-mujore, e cila ka ndërprerë furnizimet globale me energji.

“Teherani dëshiron që korridori kritik i transportit të naftës dhe gazit të hapet “sa më shpejt të jetë e mundur”, ndërsa përpiqet të zgjidhë çështjet e brendshme të lidershipit , u shpreh Trump në një postim të bërë më herët në Truth Social, duke shtuar se Irani po “shpërbëhet”. Irani ka sinjalizuar se është i gatshëm të pranojë një marrëveshje të përkohshme për të rihapur ngushticën në këmbim të përfundimit të bllokadës së Uashingtonit ndaj porteve iraniane, ndërkohë që shtyn negociatat komplekse mbi programin bërthamor të vendit . Ai këmbëngul në ruajtjen e një farë kontrolli mbi transportin detar përmes ngushticës, diçka që Uashingtoni nuk ka gjasa ta pranojë.

Çmimi i naftës së papërpunuar Brent u rrit përsëri dhe qëndroi mbi 111 dollarë për fuçi , ndërsa përshkallëzohen shqetësimet se proceset e paqes nuk po i afrohen përfundimit, që do të thotë se Ngushtica e Hormuzit do të mbetet e mbyllur për një periudhë më të gjatë kohore. Ndikimi i luftës u nënvizua nga njoftimi i Emirateve të Bashkuara Arabe të martën se po tërhiqeshin nga OPEC , duke i dhënë një goditje kartelit të naftës dhe udhëheqësit të tij, Arabisë Saudite.

Emiratet e Bashkuara Arabe, të cilat mund të prodhojnë më shumë naftë bruto sesa lejon kuota e tyre në OPEC, kanë shprehur prej kohësh pakënaqësi me kufizimet që vendos ai. Palët ndërluftuese filluan një armëpushim më 7 prill, por armiqësitë ka të ngjarë të vazhdojnë nëse nuk ka marrëveshje për bisedime të reja, pas raundit të parë të pafrytshëm në Pakistan.