Trump thotë se SHBA-ja po “fillon të flasë me Kubën” ndërsa ndërpret furnizimet me naftë

Presidenti Donald Trump deklaroi se Shtetet e Bashkuara kanë nisur bisedimet me udhëheqësit kubanë, ndërkohë që administrata e tij po rrit presionin ndaj ishullit komunist dhe po ndërpret furnizimet kyçe me naftë. Komentin, presidenti e bëri për gazetarët të shtunën mbrëma, gjatë fluturimit për në Florida. Kjo vjen pas lëvizjeve të tij të fundit për të ndërprerë furnizimet me naftë nga Venezuela dhe Meksika, veprime që, sipas tij, do të detyronin Kubën të ulej në tryezën e bisedimeve.

Qëllimet e tij me Kubën mbeten të paqarta, por Trump i ka kushtuar më shumë vëmendje ishullit pasi administrata e tij, në fillim të janarit, kapi ish-presidentin e Venezuelës, Nicolás Maduro, dhe ka qenë më agresive në përballjen me kombet që janë kundërshtarë të SHBA-së. Trump ka parashikuar se qeveria kubane është gati të bjerë. Ai nuk dha detaje të shtunën rreth nivelit të kontakteve që administrata e tij ka pasur me Kubën kohët e fundit apo kohën kur kanë ndodhur, duke thënë thjesht: “Ne po fillojmë të flasim me Kubën.”

Lëvizjet e tij të fundit për të ndërprerë furnizimet me naftë kanë vënë në vështirësi ishullin. Javën e kaluar, Trump nënshkroi një urdhër ekzekutiv për të vendosur tarifa mbi çdo mall nga vendet që shesin ose furnizojnë me naftë Kubën. Kjo lëvizje ushtroi presion mbi Meksikën, nga e cila Kuba u bë e varur për naftë pasi Trump ndaloi dërgesat e naftës nga Venezuela pas rrëzimit të Maduros.

Presidentja meksikane, Claudia Sheinbaum, paralajmëroi se kjo mund të shkaktonte një krizë humanitare, duke deklaruar të premten se do të kërkonte alternativa për të vazhduar ndihmën ndaj Kubës. Megjithatë, Trump u shpreh të shtunën se “nuk duhet të jetë një krizë humanitare. Mendoj se ata ndoshta do të vijnë tek ne dhe do të duan të bëjnë një marrëveshje.” Ai parashikoi se do të arrihej një lloj marrëveshjeje me Kubën dhe shtoi: “Kështu Kuba do të ishte sërish e lirë. Mendoj se, e dini, ne do të jemi të sjellshëm.”