Trumpi paralajmëron se Iranit po i “mbaron koha” për arritjen e marrëveshjes

Presidenti i Shteteve të Bashkuara, Donald Trump, ka paralajmëruar Iranin se “po i mbaron koha” ndërsa progresi i marrëveshjes së paqes ka ngecur.

“Ata më mirë të lëvizin, SHPEJT, ose nuk do të mbetet asgjë prej tyre”, shkroi Trump në “Truth Social”. “KOHA ËSHTË THELBËSORE!”

Mesazhi erdhi ndërsa Trump ka folur me kryeministrin izraelit Benjamin Netanyahu të dielën.

Trump paralajmëroi më herët këtë javë se armëpushimi i rënë dakord me Iranin ishte në “aparate për mbajtje në jetë” pasi refuzoi kërkesat e Teheranit për t’i dhënë fund luftës.

Trump e kishte quajtur kundërpërgjigjen iraniane ndaj propozimeve amerikane “plotësisht të papranueshme”.

Esmail Baghaei, një zëdhënës i Ministrisë së Jashtme iraniane, këmbënguli se ajo ishte “e përgjegjshme” dhe “bujare”.

Sipas agjencisë gjysmëzyrtare iraniane të lajmeve Tasnim, ajo përfshin një fund të menjëhershëm të luftës në të gjitha frontet – një referencë ndaj sulmeve të vazhdueshme izraelite kundër Hezbollahut të mbështetur nga Irani në Liban – një ndalim të bllokadës detare amerikane të porteve iraniane, dhe garanci për të mos pasur sulme të tjera ndaj Iranit.

Po ashtu raportohet se ajo përfshin një kërkesë për kompensim për dëmet e luftës dhe një theksim të sovranitetit iranian mbi Ngushticën e Hormuzit.