Një event i veçantë i Kampionatit Ultimate Fighting (UFC), që do të zhvillohet në ambientet e Shtëpisë së Bardhë, ka ngjallur debat në SHBA pas njoftimit se bonuset për luftëtarët do të paguhen në një kriptomonedhë të lidhur me biznesin e familjes së presidentit amerikan Donald Trump.
Sipas raportimeve, sportistët që do të marrin pjesë në eventin “UFC Freedom 250” do të shpërblehen me stablecoin-in e emetuar nga World Liberty Financial, një kompani kriptomonedhash e themeluar nga Donald Trump, djemtë e tij dhe familja e biznesmenit Steve Witkoff, i cili aktualisht shërben si i dërguar special i SHBA-së për Lindjen e Mesme dhe Ukrainën.
Stablecoin-i i përdorur për bonuset ka vlerë të lidhur me dollarin amerikan, çka synon të sigurojë stabilitet më të madh krahasuar me kriptomonedhat tradicionale.
Kompania World Liberty Financial figuron tashmë si sponsore zyrtare e eventit UFC Freedom 250, i cili zhvillohet më 14 qershor, datë që përkon edhe me ditëlindjen e Donald Trump.
Sipas gazetës britanike The Guardian, kjo lëvizje krijon një lidhje të drejtpërdrejtë mes interesave financiare të familjes Trump dhe një aktiviteti sportiv që promovohet në një hapësirë publike si Shtëpia e Bardhë. Analistët vlerësojnë se përdorimi i kriptomonedhës së kompanisë në këtë event mund të shërbejë gjithashtu për të rritur përdorimin dhe njohjen e saj në treg.
Megjithatë, administrata amerikane ka hedhur poshtë pretendimet për konflikt interesi. Zëdhënësi i Shtëpisë së Bardhë, Davis Ingle, deklaroi se asetet e Donald Trump administrohen përmes një trusti të menaxhuar nga fëmijët e tij dhe se presidenti nuk përfshihet në operacionet e përditshme të biznesit.
Ndërkohë, organizatorët kanë sqaruar se eventi nuk ka lidhje me organizatën “Freedom 250”, e cila promovon aktivitetet për 250-vjetorin e pavarësisë së Shteteve të Bashkuara.