Rusia nuk ka marrë ende një dokument zyrtar nga Shtetet e Bashkuara të Amerikës lidhur me planin prej 28-pikësh të SHBA-së për paqen në Ukrainë, por mbetet e gatshme për negociata, tha sot Kremlini, sipas agjencisë “Reuters”.
Uashingtoni ka paraqitur planin zyrtarisht vetëm Kievit, i cili, sipas zyrtarëve ukrainas, po studiohet me kujdes.
Zëdhënësi i Kremlinit, Dmitry Peskov, theksoi se Moska dhe Uashingtoni ende nuk kanë diskutuar propozimet në detaje: “Ka ide të caktuara nga pala amerikane, por asgjë thelbësore nuk po diskutohet aktualisht. Ne jemi plotësisht të hapur ndaj negociatave të paqes.”
Peskov shtoi se avancimet ruse në fushën e betejës po i reduktojnë opsionet e presidentit ukrainas, Volodymyr Zelensky: “Puna efektive e forcave të armatosura ruse duhet ta bindë Zelensky dhe regjimin e tij se është më mirë të negociojnë tani sesa më vonë. Hapësira për vendimmarrje po zvogëlohet ndërsa Ukraina humbet territor gjatë operacioneve ofensive ruse.”
Ai e përshkroi vazhdimin e luftës si të pakuptimtë dhe të rrezikshëm për Ukrainën, duke i bërë thirrje regjimit ukrainas për një vendim të përgjegjshëm.
Ndërkaq, Zelensky konfirmoi se Ukraina ka pranuar planin e SHBA-së, por nuk ka komentuar drejtpërdrejt mbi përmbajtjen e tij, duke shtuar në Telegram: “Ukraina është e gatshme për punë konstruktive, të ndershme dhe të shpejtë.”