Izraeli po zhvillon zgjedhje me rëndësi të veçantë, në një klimë të tensionuar pas sulmit të Hamasit më 7 tetor 2023 dhe konflikteve që pasuan në rajon. Kryeministri Benjamin Netanyahu synon të sigurojë një tjetër mandat, por përballë tij qëndrojnë kundërshtarë që kërkojnë ndryshim të drejtimit politik të vendit. Sipas Komisionit Qendror të Zgjedhjeve, pjesëmarrja arriti në 16,7 për qind vetëm tri orë pas hapjes së qendrave të votimit, niveli më i lartë për këtë periudhë që prej vitit 1981.
Pritshmëritë janë për një garë të ngushtë, pa një fitues me epërsi të qartë. Kundërshtarët e Netanyahut e akuzojnë qeverinë për dështimet e sigurisë që paraprinë sulmin e 7 tetorit dhe kërkojnë një hetim kombëtar për përgjegjësitë politike dhe institucionale. Në anën tjetër, Netanyahu mbështetet te përvoja e tij e gjatë në pushtet dhe te marrëdhëniet me presidentin amerikan Donald Trump. Ai e paraqet veten si kandidatin më të aftë për të garantuar sigurinë e Izraelit përballë kërcënimeve të jashtme.
Një rol të rëndësishëm në këtë garë pritet të luajë edhe Gadi Eisenkot, ish-shef i Shtabit të Përgjithshëm të ushtrisë izraelite, i cili premton një ndryshim të kursit politik. Ai ka deklaruar se synon të çmontojë strukturat ushtarake dhe qeverisëse të Hamasit brenda 18 muajve nga formimi i qeverisë së re. Eisenkot ka kritikuar gjithashtu rezultatet e luftës në Gaza, ku, sipas autoriteteve shëndetësore palestineze, numri i viktimave ka kaluar 74 mijë.
Përtej rivalitetit mes kandidatëve kryesorë, vëmendja është përqendruar edhe te vota e qytetarëve arabë të Izraelit. Kandidati Ahmed Tibi ka pretenduar se kjo pjesë e elektoratit po merr pjesë në votime në nivele të paprecedentë. Megjithatë, refuzimi i Eisenkot për bashkëpunim të drejtpërdrejtë me partitë arabe mund ta bëjë më të vështirë krijimin e një shumice parlamentare. Rezultati i zgjedhjeve pritet të përcaktojë jo vetëm të ardhmen politike të Netanyahut, por edhe drejtimin që do të marrë Izraeli përballë sfidave të sigurisë, pasojave të luftës dhe përçarjeve të brendshme.