Zjarr në aeroportin Malpensa, merr flakë karroca me bagazhe pranë avionit të British Airways

Një incident është regjistruar mesditën e sotme në aeroportin Malpensa të Milanos, ku një karrocë për transportin e bagazheve ka marrë flakë në platformën e Terminalit 1.

Ngjarja ndodhi rreth orës 13:00, teksa karroca, në pronësi të kompanisë së shërbimeve tokësore Aviapartner, po përdorej për ngarkimin e bagazheve në pjesën e poshtme të një avioni të British Airways, me destinacion Londrën.

Sipas raportimeve të mediave italiane, dyshimet paraprake janë përqendruar te mbinxehja e një baterie litiumi që ndodhej në një prej valixheve. Nga karroca u ngrit papritur një sasi e madhe tymi, duke alarmuar stafin e aeroportit.

Zjarrfikësit ndërhynë menjëherë dhe arritën të vënë situatën nën kontroll brenda pak minutash. Flakët mbetën të kufizuara në karrocën e bagazheve dhe në disa prej valixheve, pa u përhapur te avioni apo strukturat e tjera të aeroportit.

Një nga pistat që po shqyrtohet është edhe ndikimi i temperaturave të larta të ditëve të fundit, të cilat mund të kenë favorizuar mbinxehjen e baterisë.

Pavarësisht incidentit, aktiviteti i aeroportit Malpensa nuk u ndërpre dhe trafiku ajror vijoi normalisht. E vetmja pasojë e drejtpërdrejtë ishte vonesa e fluturimit të British Airways drejt Londrës.

Fluturimi, i cili ishte planifikuar të nisej pak para orës 14:00, u shty me rreth dy orë për shkak të kontrolleve të sigurisë dhe verifikimeve të nevojshme pas incidentit.