Zjarri në Francën jugperëndimore: Evakuohen rreth 40,000 persona

Qindra zjarrfikës kanë luftuar prej ditësh flakët dhjetëra kilometra në perëndim të Bordosë, në Francën jugperëndimore. Zjarri masiv shpërtheu të mërkurën në fshatin Saumos dhe është përhapur në gadishullin Cap-Ferret, një destinacion popullor turistik i njohur për pyjet e tij me pisha, dunat e rërës dhe restorantet e guacave, i frekuentuar shpesh nga yjet francezë.

Ministri Nunez deklaroi se “gradualisht, 40,000 njerëz janë evakuuar ose po evakuohen aktualisht”. Ai e quajti këtë zjarr “më të madhin e sezonit” dhe theksoi se deri më tani nuk ka pasur viktima të raportuara. Gjithsej 80 shtëpi janë djegur, rreth 50 prej të cilave janë shkatërruar plotësisht.

Zjarri nuk është ende nën kontroll dhe aktualisht janë dislokuar 1,000 zjarrfikës. Anijet kanë transportuar më shumë se 400 persona nga gadishulli që shtrihet përgjatë bregdetit Atlantik të Francës, në perëndim të Bordosë, sipas zyrtarëve.

Presidenti Emmanuel Macron tha në X se “situata mbetet jashtëzakonisht e tensionuar”. Ai shtoi se Franca ka aktivizuar mekanizmin e mbrojtjes civile të Bashkimit Evropian dhe do të marrë përforcime, duke përfshirë dy helikopterë Black Hawk nga Republika Çeke dhe Sllovakia.

Marrë nga France 24 Live News