Fantazma Tiranë – Beograd – Moskë

Nga Frrok Çupi

Shumë njerëz kur dëgjojnë kryeministrin aktual të Shqipërisë që flet rreth politikës europiane të vendit, menjëherë pyesin e thonë: "Po ky, kaq pak di?".

Ka shumë, ose shumica e njerëzve janë të mirë, prandaj të keqen e fusin në zarfin e "të paditurit" dhe e lënë mënjanë. Kjo është mënyra më e mirë, jo për të falur, por për të harruar.

Qeveria e Tiranës, qysh prej kohësh, është shfaqur si një "mistrece kundër Europës", por herët e fundit kur u manifestua "Shqipëria e madhe dhe e bashkuar me Kosovën", Bashkimi Europian qe i detyruar të lëvizte pak kurrizin e të mos duronte më.

Paragjykimi se "kryeministri kaq di", e ka një bazë, por jo në këtë rast. Sepse Edi Rama, i rritur në një ambient blloku byrosit, në zverk të "popullit punëtor" siç thoshte Partia, qysh në fëmijëri ishte edukuar me idenë se "jeta merret lehtë, jam në mjaltë, nuk kam nevojë për punë". Kështu e kaloi ky, si edhe të tjerë bllokistë, punën e shkollimit e të mençurimit. Nuk u bë kurrë as minimumi i profesionit që mori në shkollë. Mediokër e i lig si në bllok… Gjithë ky "kualitet" është mbrutjur edhe në kualitetin e tij si kryeministër. Ai vërtet nuk di.

Por kjo nuk ka lidhje me shkelmat e tij shumë të studiuar kundër Europës.

Provokimi se po punojmë bashkë me Thaçin për Shqipërinë e Madhe e të bashkuar me Kosovën, ishte i fundit. Por ishte aq shumë i studiuar. Deklarata u bë në territoret e ish- Jugosllavisë, në Malin e Zi. Intervistuesi, një gazetar kosovar, është njohës i mirë i gjuhës serbe dhe bash për këtë arsye ai e kërkoi frazën- bombë prej kryeministrit (dhe mikut të tij) të Shqipërisë, si një mesazh që do ta transmetonte personalisht për në Veri të Ulqinit ku u mbajt intervista.

Por këto nuk janë arsyet kryesore të tehut anti- europian të deklaratës. Beogradi po e priste njësoj siç pret media një lajm të parapërgatitur. Brenda pak minutash qeveria serbe bëri sikur u mërzit dhe i kërkoi Bashkimit Europian "o ndalni këtë luftënxitës, o ne do të reagojmë". Në fakt, në këtë mënyrë qeveria e Serbisë bashkoi zërin e saj me "luftënxitësin shqiptar", por kundër Bashkimit Europian.

Çfarë do të bënte qeveria e Serbisë sikur BE të mos reagonte kundër Tiranës?

Sigurisht, të gjithë e dinë: Do të merrte edhe një shkak më shumë për të shkuar në prehrin e Moskës.

Po sikur BE të reagonte ashpër kundër "luftënxitësit" të Tiranës?

Edhe në këtë rast, qeveria e Tiranës do të bënte pak centimetra në drejtim të Moskës, meqë "Europa që ka nevojë për ne, edhe po na qorton". Ideja e Edi Ramës, se ne kemi nevojë për Europën, aq sa "Europa ka nevojë për ne", edhe pse ide shumë enveriste, është shtruar me qëllim që sot të ishte gati "të zemërohet me Bashkimin Europian", sapo BE t'i tërheqë veshin.

Ka një rrugë të gjatë që po përgatitet që qeveria e re socialiste (ish- komuniste) e Tiranës, të anojë për nga Moska. Të gjitha gjasat atje të çojnë, qoftë edhe për faktin themelor se këta po ringjallin sjelljet kryesore të origjinës komuniste.

Por konkretisht, Edi Rama, si kryeministër, ka marrë rolin e "shakaxhiut" mes kryeministrave të vendeve aspirante për në Europë. Jo pa qëllim e ka ndërtuar këtë portret. Dhe jo pa qëllim ky "luftënxitës" shqiptar zbret në aeroportet e botës, i veshur alias Hugo Chavez. Me këtë rast "zhvishet" nga kostumi klasik i komunistëve enverist shqiptar duke u dëshmuar trendy.

Në anën tjetër i lë botës për të nënkuptuar se "çfarëdo them, e them si shakaxhi dhe si mjeshtër i veshjes lirshëm". Me këtë koperturë ka luajtur si Serbia edhe Moska. Por me sa duket, ky është vetë stili i zgjedhur për t'u kamufluar. Rasti më i fundit ishte darka pas ndeshjes me dron në Beograd. Pasi Rama "bëri luftë nacionaliste" me kryeministrin e Serbisë, zhveshi kostumin klasik dhe u shtrua në një darkë marramendëse ku bëheshin shakatë kundër Europës. Aty u tha prapë se "Europa ka nevojë për ne (shqiptarë e serbë), aq sa ne kemi nevojë për atë".

Që në momentin e parë kur qeveria thuajse socialiste e Tiranës erdhi në pushtet, që në atë moment nisi "rrethimin" e Europës, ose ndryshimin e radarit të Tiranës në drejtim të Lindjes. Që në takimin e Prizrenit, kryeministri Thaçi dhe kryeministri Rama i garantuan presidentit turk Erdogan (një nga katër autokratët e botës moderne), se "Kosova është Turqi" dhe se Shqipëria e ka dorën të shtrirë drejt ëndrrës Otomamike të Erdogan.

Padyshim, kuptimi i parë nuk ishte kuptim ekonomik, siç edhe tentuan ta thonë, por kuptim i radhimit përsëri në drejtim të Lindjes. Pak nga pak Tirana është kthyer me busull nga Moska, madje edhe në rastin kur haptazi deklaroi afrim të ngrohtë me Pekinin.

Pas deklaratave megalo- otomane në Prizren, kryeministri i Shqipërisë i dha një grusht të rëndë idesë së kancelares gjermane Merkel për të vënë një bllok ballkano- perendimor kundër ekspansionit të Moskës drejt Ukrainës dhe Europës. Në grindjen e bujshme të Ramës me Vuçiç në Beograd, u konstatua haptazi se "ne ballkanikët nuk jemi të bashkuar rreth Gjermanisë (Europë), por në një drejtim tjetër". Edhe grindja u shpik në mënyrë artificiale, veç sa për t'i thënë Moskës se "jemi të hapur".

Orientimi i këtyre ditëve i qeverisë greke të Tsipras drejt Moskës, i ka dhënë një shans ose krah tjetër qeverisë së Tiranës për të qenë "e guximshme" në drejtimin e Moskës. Aq më tepër që janë dy qeveri si dy pika ujë të ngjashme: Të dyja të majta dhe shumë të majta, të dyja jo aq të përgjegjshme për çfarë thonë e çfarë bëjnë.

Atëherë edhe devijimin drejt Moskës, qeveria e Tiranës do ta bëjë nën këtë logo: "Jo shumë të përgjegjshëm për çfarë themi e për çfarë bëjmë!". Kujtoni edhe rolin e shakaxhiut Rama nëpër kacelaritë e Europës.

Pra kështu po anohet Tirana në boshtin Athinë- Beograd e Moskë. Ja, ashtu si…. "të paditur dhe të papërgjegjshëm".

KOHA JONE