Kazani i sherrit
“Kazani i sherrit” po zien përditë mes PS-së dhe LSI-së. Por një valvul plasi publikisht dje paradite mes kreut të grupit parlamentar dhe nënkryetarit të LSI-së, Petrit Vasili dhe ministrit të Pushtetit Vendor, Bledi Çuçi. Në të vërtetë, sherri ndërmjet PS-LSI ka filluar që pas zgjedhjeve vendore të këtij viti, ku sipas LSI-së, ishte PS-ja ajo që e tradhtoi në disa bashki, të cilat ishin fituese për Ilir Metën. PS-ja bashkëpunoi fshehur me PD-në, ose në rastin më të mirë, nuk dolën në votime në ato bashki ku ishin kandidatë të LSI-së. Ka edhe prononcime nëpër dhëmbë, si të Viktor Tushës në Lezhë, që thotë se Mimi Kodheli ministre e Mbrojtjes kishte punuar e udhëzuar strukturat e PS-së lokale që të mos votonin kandidatin e LSI-së, ndonëse ishin me kandidatë të përbashkët si koalicion. Më pas, kazani e rriti temperaturën gjatë muajve korrik-gusht, e ku në fundshtator sa nuk plasi mes Edi Ramës e Ilir Metës. PS-ja sajoi çështjen “CEZ-DIA” dhe u hodhën në sulm me disa qarqe mediatike bazhibozuke, siç thotë Andi Bejtja, me synim eliminimin politik të LSI-së. Bile kishin nw plan edhe pak më keq se kaq.
Gjithsesi u hap një valvul shkarkimi duke e shfryrë paksa temperaturën dhe presionin në “kazanin e sherrit”. U kërkua nga Ilir Meta për të ndryshuar qeverinë dhe mënyrën e qeverisjes. Prapë Edi Rama nuk pranoi. Atëherë kreu i LSI-së i futi “kazanit” një minë me sahat siç është Ylli Manjani, që nëse shpërthen, e hedh në erë krejt qeverinë. Manjani mbetet “kamikaz i së drejtës” dhe duket se nuk do të vonojë kur të kundërshtojë ndonjë praktikë apo nismë ligjore të kryeministrit. Kjo do të jetë mina!
Por duke ardhur në momentin e djeshëm, Petrit Vasili është gjendur si grup parlamentar para një fakti të parakorduar mes PS-së e LSI-së, siç është çështja e shkrirjes së 12 qarqeve të Shqipërisë. Dihet se janë 12 qarqe në shkallë Republike dhe se janë institucione të krijuara me Kushtetutë. Por ministri Çuçi, natyrisht me lejen e kryeministrit, ka folur para komisionit parlamentar për projekt-buxhetin e vitit 2016 për pushtetin vendor se nuk do të jenë 12, por vetëm 4 qarqe. Kjo ka krijuar tension, sepse PS-ja dhe LSI-ja janë në bashkëqeverisje dhe duhet të bashkëvendoset një nismë e tillë, e cila sipas Vasilit të LSI-së, është antikushtetuese dhe pa vizion. Petrit Vasili tha se këto veprime të njëanshme të qeverisë sjellin pasoja negative.
“Ky është një qëndrim i pakonsultuar, kemi të bëjmë me një atrofizim të qarqeve. Për ne janë të papranueshme improvizimet jokushtetuese ndaj qarqeve. Duhet një qëndrim i pjekur dhe i konsultuar gjerësisht. Qëndrimi aktual është i nxituar dhe pa vizion dhe vendimet e njëanshme prodhojnë pasoja negative”,- tha nënkryetari i Lëvizjes Socialiste për Integrim.
Duket se LSI-ja dje është vendosur para faktit të kryer nga ana e Ministrisë së Pushtetit Vendor. Të shpërndash paratë në 4 qarqe në vend të 12, do të thotë që gjithë fondet të shkojnë në duart e kryebashkiakëve të Partisë Socialiste. Pasi bashkitë kryesore në rang vendi si Tiranë, Shkodër, Fier, Elbasan dhe që do të kenë rolin e qendër-qarqeve, drejtohen nga PS-ja. Ndarja e vendit në 4 rajone e bën edhe më kompleks procesin e investimeve dhe duke qenë se viti i ardhshëm është thelbësor për mandatin e kësaj mazhorance, pasi çdo forcë politike në koalicion do përpiqet të mbajë premtimet në njësitë vendore që drejtohen nga krybashkiakët e saj. Por çështja e buxhetit ka dhe një tjetër motiv që shtyn sherrin mes PS-së dhe LSI-së. Përveç ministrisë së Bujqësisë, ministritë e tjera si ajo e Transporteve kanë një ulje të buxhetit në krahasim me një vit më parë. Diçka e tillë nuk thuhet zyrtarisht, por duket se ka një tendencë të PS-së për ta përqendruar shumicën e buxhetit në duart e ministrive që drejtohen nga socialistët. Kjo logjikë vlen për partinë, por nuk vlen për koalicionin. Nëse shihen reagimet e LSI-së që nga prezantimi i buxhetit, duket se kritikat e saj janë më të ashprat dhe më direkte. Si fillim, disa deputetë të saj kritikuan vendosjen e akcizës për birrën, më pas u kritikua buxheti për arsimin, i cili vijon të jetë nën nivelin e premtuar gjatë fushatës elektorale. Me kritikat e djeshme të Vasilit për shkelje të Kushtetutës, duket se marrëdhëniet në koalicion po arrijnë sërish në pikën e vlimit.
Fakti që ministri i Ramës dhe Petrit Vasili, i grupit parlamentar të Metës, nxorën ‘dorezat e boksit’, tregon se po përgatitet ndeshja finale Rama-Meta. Kur do të jetë ndeshja? Edhe këto Krishtlindje do t’i hanë nën një çati!
