LSI, Kërpaçi: Rama i pandehur, e jo rinia!

Partitë kryesore të opozitës, PD dhe LSI, aksionin në terren ua kanë besuar këto ditë forumeve rinore. Të rinjtë e Forumit Rinor të Partisë Demokratike (FRPD) dhe Lëvizjes Rinore për Integrim (LRI) zhvilluan dje protestën e dytë para godinës së Ministrisë së Brendshme. Qëllimi protestave, sipas organizatorëve, është denoncimi i korrupsionit qeveritar, lidhjeve të qeverisë “Rama” me bandat e drogës dhe largimi i ministrit të Brendshëm, Fatmir Xhafaj. Protestat janë zhvilluar pa incidente, përveç parullave dhe sloganeve artistike, të rinjtë pas tubimeve kanë pastruar edhe sheshin nga mbetjet e protestës. Ndaj organizatorëve të protestës dje nisi një procedim penal për zhvillim tubimesh të jashtëligjshme. Ndërkohë burime nga organizatorët thanë dje se për zhvillimin e tubimit është marrë leje zyrtarisht, sipas procedurave.  Ky vendim i institucioneve në vend që t’i stepte protestuesit bëri që në mitingun e radhës numri i protestuesve të ishte disa herë më i madh. Ndërkohë që në ditët e ardhshme, të provokuar dhe nga padia e institucioneve, të rinjtë kanë premtuar tubime edhe më të madha, jo vetëm para Ministrisë së Brendshme, por edhe para Kryeministrisë. Vendimi për të nisur procedim penal duket se është bërë me nxitimin e qeverisë për të “shtypur” që në lindje çdo protestë. Policia mund të ngrejë padi kur dhunohen institucionet apo kur goditën efektivët e rendit në krye të detyrës, por jo kur disa djem dhe vajza hedhin parrulla kundër qeverisë. Në vend të qetësimit të situatës, efekti i tyre mund të sjellë të kundërtën vazhdimin e protestave dhe me më shumë forcë. Paralajmërimi për shtimin e protestave u bë dje nga Kryetarja e LRI-së, Floida Kërpaçi. Në fjalën e mbajtur para protestuesve përfaqësuesja e LRI-së u shpreh se prokuroria nuk duhet të hetojë të rinjtë që protestojnë, por Edi Ramën që sipas saj e ka shkelur jo pak herë ligjin. “Në qershor të 2017, Edi Rama i bëri thirrje Policisë së shtetit që të heqin kapelet dhe të bëjë vota për Rilindjen, por çfarë ndodh? Ndodh që Prokuroria jo vetëm që nuk e procedon penalisht kryeministrin, por kemi një rast që tregon drejtpërdrejt se drejtësia nuk është e barabartë për të gjithë, se për kryeministrin mjafton të kërkojë një falje në Facebook dhe ai falet, ndërkohë që për një qytetar të thjeshtë, për një të ri që del dhe proteston, sepse nuk beson te bandat, të ekonomia që është rrënuar, ku të rinjtë po largohen çdo ditë e më shumë, do të procedohen penalisht”,- deklaroi dje kryetarja e LRI-së, Floida Kërpaçi. Në të njëjtën linjë për marrjen të pandehur të kryeministrit ishte dhe kreu i FRPD-së, Belind Këlliçi i cili e cilësoi padinë ndaj të rinjve të njëjtë si në kohën e komunizmit.

Pavarësisht për motivet e protestës dhe akuzave mbi të cilat ka ngritur kauzën opozita, e drejta e të rinjve për të tubuar dhe shprehur pakënaqësinë politike nuk mund të ndalohet me procedime penale. Protestat e të rinjve realisht nuk kanë qenë të mëdha në numër, por janë një model i ri i reagimit që duhet vlerësuar. Zakonisht forumet rinore të partive janë përdorur vetëm në fushata zgjedhjesh dhe si mbledhës protestuesish në protestat e mëdha të partive kryesore. Këtë herë aksioni, organizimi, koordinimi dhe mesazhet kanë qenë në dorë të drejtuesve të forumeve rinore dhe ky është sinjali për një model ndryshe të partive. Fakti që të rinjtë kanë kritika dhe nuk pajtohen me këtë model qeverisje nuk mund të ndalohet me procedime penale. Të kesh rezerva për protestën është pjesë e debatit demokratik, ta ndalosh atë me padi është cënim i parimeve të demokracisë. Paditë ndaj të rinjve ende nuk kanë marrë vulën përfundimtare, por nëse qeveria mendon se në këtë mënyrë do të ndalojë protestat, vetëm sa u ka dhënë një arsye më shumë të rinjve për të dalë në rrugë.

Dhe të rinjtë kur marrin vrul nuk ka ministër apo kryeministër që i ndalon në përballjen e tyre me qeverinë.

Ndaj tërhiqeni urgjent paditë ndaj rinisë së LRI dhe FRPD.

A.Lani