Përse po sulmohet KLSH?
Editorial E Diel, 18 Prill 2021 19:46
Prej tre ditësh përfaqësuesit kryesorë të Qeverisë dhe Partisë Socialiste janë hedhur në sulm të egër ndaj Kontrollit të Lartë të Shtetit. Shkak është bërë padia penale e KLSH-së ndaj ministrit të Energjisë, Damian Gjiknuri dhe Avokates së Shtetit, Alma Hiçka për nënshkrimin e marrëveshjes mes CEZ-in. Raporti i KLSH-së ka gjetur shkelje që i kanë kushtuar buxhetit të shtetit 479 milionë euro nga nënshkrimi i paktit të mirëkuptimit me biznesin çek të “CEZ Shpërndarje”-s. Fillimisht ishte ministri Gjiknuri në konferencë dhe në Parlament deklaroi se akuzat e KLSH-së ishin të njëjta me ato që i ka bërë pak kohë më parë Partia Demokratike. Të njëjtën gjë përsëriti dhe Avokatja e Shtetit. Ndërsa dje në mënyrë zyrtare Partia Socialiste, me anë të deputetit Ervin Bushati, shkoi edhe më tej në akuza. “Çdo ditë e më shumë del në pah qarku i shkurtër, mes Kontrollit të Lartë të Shtetit dhe Partisë Demokratike”, – tha ai. Sipas PS-së, institucioni kushtetues i KLSH-së është një aneks i Partisë Demokratike. Kjo deklaratë e bërë në mënyrë zyrtare nga Partia Socialiste është një hap prapa në gjithë qëndrimet e mbajtura më parë nga selia rozë, kur deklarohej se nuk do të sulmoheshin institucionet kushtetuese. Në rastin e çështjes CEZ mazhoranca e PS-së po bën pikë për pikë atë që bënte dje Partia Demokratike duke sulmuar çdo institucion, përfshirë edhe gjykatat kur qëndrimet e tyre nuk ishin në favor të saj. Tamam si Berisha para vitit 2013 !
Por sulmi i Partisë Socialiste ndaj KLSH-së për CEZ-in nuk është vetëm tek deklarata. Kryeministri Rama personalisht nuk e ka përmendur KLSH-në, por indirekt e ka marrë në mbrojtje marrëveshjen e CEZ-it duke i quajtur të pavlefshme akuzat. Investimi i PS-së kundër KLSH-së këto ditë ka bërë që të ndërmerren dhe nisma deri diku absurde.
Turravrapi që kanë marrë deputetët dhe ministrat e PS-së për të sulmuar KLSH-në, të kujton vetëm qeverisjen e PD-së, kur mazhoranca lëshohej kundër Prokurorisë, Presidentit dhe çdo zëri kritik ndaj saj. Edhe atëhere kryeministri Berisha sulmonte Ina Ramën si Prokurore e Republikës kur i digjte. Nga “Silvia Konti” ajo u kthye në tabelë qitje për PD. E padrejtë dhe krejtësisht e turpshme. Tani ka vjedhur zanatin e Berishës vetë PS-ja. Në një farë mënyre Edi Rama, duke e ditur se nuk i dihet se si mund të dalin letrat nga hetimi nuk po flet vetë. Por prapë ka nxjerrë urdinë e “oborrtarëve” për sulm kundër Bujar Leskaj. Por ka informacione se Bujar Leskaj akoma nuk e ka hapur thesin e letrave që në zyrë për dikë në PS!
Çështja e CEZ-it është kthyer në një çështje politike, pasi në këtë lojë janë përfshirë më akuza PS-PD dhe LSI. Por në thelb, ajo është një çështje që ka të bëjë me ligjin. Kontrolli i Lartë i Shtetit është një institucion kushtetues dhe jo një degë seksioni e partive politike. Kur ky institucion pretendon se ka shkelje, minimalisht duhet pritur të flasë Prokuroria. Verifikimet e KLSH-së për marrëveshjen kanë nisur në muajin mars të këtij viti, kur ende çështja “CEZ” nuk ishte marrë në dorë nga politika. Hartimi i padisë ka marrë gati më shumë se një muaj kohë dhe ekspertët e KLSH-së apo drejtuesit e tijj nuk kanë vendosur të luajnë me karrierën e tyre për t’i bërë qejfin PD-së. Ashtu siç mbajnë përgjegjësi ministrat për firmat, mbajnë përgjegjësi dhe ekspertët e KLSH-së në paditë e hartuara. Në rastin konkret, padia e KLSH-së duhet vlerësuar edhe më tepër, si një gjest që tregon se jo të gjithë drejtuesit e institucioneve janë vënë në rresht sipas humorit të mazhorancës aktuale. Kjo tregon se ka ende demokraci.
Ka dhe një arsye më shumë pse sulmi ndaj KLSH-së është i pavend. Ishte Partia Socialiste ajo që deri para ca kohësh u referohej raporteve të KLSH-së për abuzimet e ish-ministrave të qeverisë ‘Berisha’. Disa vite më parë, si përfaqësues i PS-së, pikërisht Gjiknuri tundte para mediave raportet e KLSH-së për abuzimet me karburantet në kohën e Berishës. Kur ky institucion publikonte abuzimet në Ministrinë e Integrimit, Ministrinë e Kulturës dhe atë të Punës në kohën e PD-së, deputetët socialistë ishin të parët që vlerësonin punën e Bujar Leskajt. Si ka mundësi që institucioni që padiste zyrtarët e Berishës, sot është bërë më Berishën për të sulmuar Partinë Socialiste?!
E padrejtë kjo mënyrë sulmi. Përgjigja më e mirë e PS-së dhe e Qeverisë do të ishte “t’ia lemë drejtësisë”. Dhe me kaq. Më pas ishin prokurorët që vendosin, e në fund të fundit mbetet gjykata.
