Presidenti Meta: Adem Demaçi do mbetet përjetë maratonomaku i lirisë!

Editorial Kryesore E Premte, 20 Gusht 2021 00:47

Presidenti i Republikës, Ilir Meta ishte sot i pranishëm në ceremoninë mortore dhe homazhet shtetërore për nder dhe respekt të Atdhetarit, luftëtarit të lirisë e simbolit të rezistencës kombëtare, “Mandelës së Evropës”, Adem Demaçi.

Presidenti Meta u takua dhe u shprehu personalisht ngushëllimet dhe hidhërimin e thellë bashkëshortes, zonjës Xhemajlie Demaçi, si dhe vajzës Abetare dhe djalit Shqiptar, të afërmve, miqve, bashkëluftëtarëve, bashkëvuajtësve e bashkëpunëtorëve të shumtë të të ndjerit Demaçi.

Presidenti Meta vendoi një kurorë me lule duke bërë homazhe e duke nderuar kujtimin dhe veprën e luftëtarit të lirisë së Kosovës dhe simbolit të rezistencës shqiptare, i cili pas ceremonisë shtetërore të lamtumirës, do të prehet në “Varrezat e Dëshmorëve” në Velani.

Në fjalën e rastit në ceremoninë shtetërore të mbajtur në Sheshin “Gjergj Kastrioti- Skënderbeu” në Prishtinë, Presidenti i Republikës, Ilir Meta, në prani të autoriteteve më të larta të Republikës së Kosovës duke filluar nga Presidenti Thaçi, kryeministri Haradinaj, si dhe drejtuesit e institucioneve të Shqipërisë, Maqedonisë, Malit të Zi, Luginës së Preshevës, dhe mijëra bashkëatdhetarëve të ardhur nga mbarë trojet shqiptare e nga Diaspora mbajti fjalën e rastit.

Fjala e kreut të shtetit shqiptar, Ilir Meta:

“Jemi mbledhur sot këtu t’i japim lamtumirën e fundit heroit të pashembullt të rezistencës për liri e dinjitet kombëtar e njerëzor.

Në jetën e tij prej shqiptari të ndershëm e fisnik, ai kurrë dhe asnjëherë nuk u dorëzua dhe nuk u step.

Por qëndroi gjithmonë në këmbë e stoik, ballë për ballë me të keqen dhe tiraninë, në luftë me ata që shtypnin me dhunë popullin dhe kombin tonë.

Qëndroi, luftoi dhe fitoi!

Duke u bërë për të gjithë shqiptarët, modeli dhe shembulli i përkushtimit për Atdheun, i sakrificës dhe i dashurisë për të, i vetëmohimit dhe i dedikimit me gjithçka e pa cak për lirinë e popullit!

I dashur Baca Adem,

Jeta jote ishte luftë, dhe ti këtë luftë e fitove!

Jeta jote ishte sakrificë pambarim, por ti ia dole t’i përballosh e t’i sfidosh ato si rrallëkush, e me urti e fisnikëri, sepse ti ishe dhe mbete Adem Demaçi i Kosovës, dhe Kosova dashuria e shpirtëzuar në Ty!

Evropa dhe e gjithë bota të njohu, si ‘Mandela i Evropës’, si ‘Saharovi’ shqiptar, si i burgosuri politik me më shumë vite burg të vuajtura në ish-Jugosllavi.

Por në fakt ti ke qenë, je e do të mbetesh përjetë Adem Demaçi shqiptar, maratonomaku i palodhur i lirisë!

Ti, je njeriu, je prindi, shoku e miku përherë pranë, je intelektuali e qytetari, shkrimtari e gazetari i pakompromis, mbrojtësi i të drejtave të njeriut pa marrë parasysh se cilit komb i takojnë, politikani i veçantë në veprime dhe qëndrime, humanisti i shquar, ti je Adem Demaçi, njeriu ndryshe i nënqiellit tonë.