PS-LSI miratojnë draftin “Donald Lu”

Dje mori udhë drafti amerikan për në Parlament. Qeveria miratoi me ministrat e PS-së dhe LSI-së, siç donin amerikanët dhe BE-ja, projektligjin “Për Byronë Kombëtare të Hetimit”. Dhe janë gati ta kalojnë në sallën e Parlamentit për ta votuar. Duhen edhe votat e opozitës që drafti të kalojë e të marrë fuqi ligjore dhe kushtetuese. Sali Berisha, ish-Kryeministër dhe një njeri që e mban fjalën e dhënë, ka mundësinë të bindë deputetët e PD-së që ta votojnë dhe më pas fillon punë Byroja Kombëtare e Hetimit. Edi Rama dhe Ilir Meta dje janë takuar bashkërisht paradite dhe më pas ka ardhur mbledhja e qeverisë, e cila kaloi draftin amerikan të Byrosë Kombëtare të Hetimit.

Më në fund duket se shqetësimi amerikan dhe i BE-së u largua, pasi tashmë Byroja Kombëtare e Hetimit (BKH) do të  jetë në veprim në muajt e ardhshëm. SHBA-të kanë deklaruar se do t’i specializojnë hetuesit e BKH-së, të cilët do të jenë me kulturë amerikane hetimi e më pas prangat do të kërcasin mbi çdo zyrtar të lartë që ka shkelur e shkel ligjin. Ambasadori amerikan Donald Lu do të mbahet në memorien e shqiptarëve si Njeriu që shkatërroi mafien në Parlament dhe si diplomati që punoi për të përmbysur drejtësinë e korruptuar. Kurajoja dhe vendosmëria e zotit Lu është e një diplomati karizmatik dhe të vendosur për të ndryshuar nga pak e përditë tablonë e politikës shqiptare, e cila do të jetë më e përgjegjshme dhe ligjore.

Por drafti ka kaluar pragun e qeverisë dhe të kryesisë së Parlamentit dhe ka shkuar në tavolinat e deputetëve për t’u diskutuar e miratuar. Tashmë mbetet që vetëm PD-ja të mbajë premtimin e thënë publikisht, ta miratojë.

Tani topi duket se ka mbetur në fushën e Lulzim Bashës, i cili për hir të vërtetës është i pari që e do këtë draft amerikan, por ka skalione ish-ministrash të PD-së, të cilët frikësohen nga kalimi i këtij drafti për BKT se mund të arrestohen.

Lulzim Basha ndodhet para amerikanëve dhe premtimit si lider opozite që nesër do të jetë edhe Kryeministër, nëse fiton zgjedhjet. Ndaj nëse e kalon draftin siç duan amerikanët dhe siç duhet për popullin shqiptar Lulzim Basha do të jetë politikani që theu tabutë e selisë blu, e cila voton draftin e mazhorancës, kur  drafti është ligjor dhe korrekt, ku natyrisht janë amerikanët pas draftit.

Nëse drafti kalon në Parlament siç e sollën amerikanët atëherë mund të thuhet se edhe drafti për drejtësinë, që po endet nëpër zyra, do të miratohet bashkërisht PS-LSI-PD.

Nëse PD-ja nuk e voton draftin e BKH, atëherë do të jetë sinjal që edhe drafti për drejtësinë nuk do të kalojë.

Donald Lu këtu është dhe shënon! Pas tij është Departamenti Amerikan i Shtetit, është vetë John Kerry që po vjen të dielën në Tiranë. Dhe me Atë nuk bëhet shaka! Ai vjen nga Shteti më i madh i Botës, nga aleati më strategjik i Shqipërisë.