Sot zgjidhet Presidenti i ri

Parlamenti do të zgjedhë sot Presidentin e ri të Republikës. Ilir Meta është kandidatura unanime e aleancës PS-LSI-PDIU për këtë detyrë të lartë. Grupi Parlamentar i LSI-së propozoi emrin e kreut të kësaj force politike Ilir Meta dhe atë të Ministrit të Drejtësisë, Petrit Vasili si kandidatët për kreun e shtetit. Pas negociatave mes LSI dhe PS, kryesia e selisë rozë ka dalë dje me një vendim unanim për të mbështetur Ilir Metën si kandidat për postin e Presidentit të Republikës. Mbështetja totale e PS-së për Ilir Metën dhe mos nxjerrja e asnjë kandidature tjetër, bënë që mazhoranca të shkojë e unifikuar në votim e sotëm. Sot në orën 17:00 pritet të mbahet votimi në Kuvend. Shqipëria do të ketë Presidentin e ri.

Vendimi i PS-së u zyrtarizua mbrëmjen e djeshme duke i hapur rrugë procesit të votimit në Kuvend dhe duke i dhënë fund ngërçit politik. Zgjedhja e kreut të ri të shtetit vjen pas një serë tentativash për të patur një konsensus mes opozitës dhe mazhorancës. Kuvendi zhvilloi tre raunde votimesh për kreun e shtetit pa asnjë kandidat. Kreu i Kuvendit Ilir Meta dhe Kryeministri Edi Rama kërkuan publikisht që në tre raundet e para Partia Demokratike të sillte kandidatët e saj për votim. Mazhoranca ishte e gatshme të votonte një kandidatur të pranueshme nga PD-ja. Por opozita bojkotoi të tre raundet duke rrezikuar të çojë vendin në krizë presidenciale, përveç krizës zgjedhore ku është futur prej disa javësh.

Në këto kushte mazhoranca u detyrua të zgjedh mes zgjedhjeve të parakohshme për shkak të mungesës së një presidenti, apo të zgjedh një emër nga radhët e saj. Emri i Ilir Metës është më përfaqësuesi jo vetëm i aleancës PS-LSI, por edhe i gjithë klasës politike. Përveçse ka një karrierë brilante politike si Ministër, Zv/Kryeministër, Kryeministër, Kryetar Parlamenti dhe drejtues i një force të rëndësishme politike, Ilir Meta ka prestigjin e lartë për të qenë  drejtues shteti. Ilir Meta ka mbështetjen absolute të koalicionit PS-LSI-PDIU për kreun e shtetit, por gjithashtu gëzon dhe mbështetjen e Partisë Demokratike. Edhe pse dje kreu i PD-së, Lulzim Basha foli nga çadra me tonë të forta, dikur ishte vetë Lulzim Basha ai që vlerësonte qëndrimet e Metës dhe LSI për situatën politike. Nuk është çudi që sot Meta si kandidat për President të marrë dhe mbështetjen e Partisë Demokratike.

Ndërkohë që ish-kryeministri Sali Berisha dhe ish-lideri historik i Partisë Demokratike, edhe sot, e sheh Ilir Metën dhe rolin e tij në politikë mjaft pozitiv për zhvillimet politike në vend. Dy ditë më parë, në intervistën e dhënë për “Ora Neës”, Berisha tha: “Përpjekjet e Ilir Metës janë për t’u vlerësuar. Një njeri që thotë se mandatet e mia janë në favor të zgjidhjes së krizës, unë mendoj se ai ka bërë detyrën e tij me përgjegjësi. Çdo politikan që ka nuhatje politike e sheh që vendi është zgrip”,- ka komentuar ish kryeministri Sali Berisha gjatë intervistës së tij në “Tonight Ilva Tare”.  Me shumë se sa Sali Berisha nuk mund të gjykojë njeri tjetër në PD, pasi PD-ja shtyllë kurrizore ka Berishën.

Edhe Edi Rama u shpreh në Top Story: “Është një president që me siguri mund të kompensojë boshllëkun e madh që kemi patur deri më tani. Është një President i lidhur me të gjithë. Ka akses tek të gjithë, flet me të gjithë dhe u thotë të gjithëve se çfarë mendon. Kjo është një zgjidhje ideale edhe për vetë PD”- tha kryeministri.

“Edhe sot Ilir Meta është kandidat për President që vjen natyrshëm sepse është situata e tillë që kërkon Ilir Metën President. Po të mos ishte kjo situatë, Meta do të ishte në krye të betejës për të marrë edhe më shumë deputetë dhe për të qenë në vazhdimësi pjesë e jetës politike aktive”, shtoi Kryeministri Rama. “Nesër Ilir Meta zgjidhet President i Republikës me mbështetjen e plotë të LSI dhe PS”,-vijoi Kryeministri te Sokol Balla.

Sot Shqipëria do ketë Presidentin e ri të Republikës.

Qamil Xhani