Ultimatumi Lu

Ndërkombëtarët duket se e kanë humbur durimin me klasën politike në vend. Në takimin e djeshëm të Komisionit të Posaçëm për Reformën në Drejtësi, ambasadori i SHBA-ve Donald Lu dhe ambasadorja e BE-së, Romana Vllahutin kanë kërkuar afate konkrete për miratimin e reformës në drejtësi. Dy diplomatët kanë kërkuar që partitë të heqin dorë nga lojërat politike dhe brenda muajit qershor reforma të jetë e miratuar. Kërkesa për miratimin e dokumentit final është bërë dhe herë të tjera, por ndryshe nga më parë, dje qëndrimet e diplomatëve kanë qenë në formë ultimatumi.

Më i drejtpërdrejtë ka qenë ambasadori i SHBA-ve, Donald Lu. Në gjuhën shqipe, u tha përfaqësuesve të partive politike se nuk ka më justifikime. Ai solli në vëmendje faktin se Presidenti i SHBA, Barak Obama, Kancelarja gjermane Angela Merkel dhe gjithë zyrtarët e BE dhe SHBA kanë dhënë mbështetjen për këtë reformë. Si asnjë herë tjetër ndërkombëtarët kanë dalë hapur në favor të një projekti që duhet të ishte miratuar. Një mbështetje e jashtëzakonshme dhe nga politikanët pritet vetëm që të bëjnë punën e tyre, të votojnë ligjet. Pra mos bëni fjalë, por votojeni këtë që ju kemi sjellë ! Po guxuat ndryshe, mendojeni!

Nuk kanë munguar dhe kërcënimet direkte në fjalën e ambasadorit. Kërcënime për çdo forcë politike, apo drejtues partie që do të dalë kundër saj. “E mëshiroj partinë e verbër politike apo udhëheqësin e shurdhët politik që e bllokon këtë reformë.  E para, do të dështoni nëse kërkoni ta bllokoni këtë reformë. E dyta, do të përballeni me zemërimin e publikut shqiptar vitin e ardhshëm në zgjedhjet parlamentare, nëse mendoni se mund të mbroni gjykatësit dhe prokurorët e korruptuar duke e bllokuar këtë reformë”, – tha diplomati amerikanë.

Qëndrime më të qarta në favor të kalimit të draftit në Kuvend nuk janë mbajtur asnjë herë. Duke parashikuar dhe kundërshtimet që mund të vijnë për pikat e draftit përfundimtar, diplomati Lu deklaroi se dokumenti i rishikuar është hartuar nga ekspertët më të mirë të BE dhe SHBA. Deklaratat e ashpra të ambasadorit Lu duket se dhanë efekt. Fill pas fjalimit Kryeministri Edi Rama deklaroi se ishte dakord plotësisht me qëndrimin e diplomatëve të huaj. Sipas tij, Partia Socialiste është gati ta miratonte menjëherë dokumentin e reformës. Nga ana tjetër, kreu i Kuvendit dhe i LSI-së, Ilir Meta ka shprehur qëndrimin e njohur të tyre të bërë përherë publik se janë për kalimin e reformës sa më shpejt. Madje, sipas Metës reforma duhet të ishte miratuar me kohë dhe kjo gjë do kishte dhënë efekte direkte në procesin e integrimit në BE. Për kreun e PD-së, Lulzim Basha opozita nuk është kundër reformës, por sipas tij deri më sot miratimi është penguar nga Partia Socialiste dhe propozimet e saj që kanë qenë kundër  gjetjes së konsensusit.

Përpara se diplomatët e SHBA dhe BE të uleshin në tryezën e komisionit për reformën në drejtësi, gjatë ditëve të fundit kanë pasur takime intensive me drejtuesit e partive politike. Të martën janë zhvilluar disa takime të veçanta me kreun e PD-së, Lulzim Basha dhe ish-kryeministrin Sali Berisha. Duket se në takimet e fundit është marrë dakordësia paraprake për kalimin e reformës nga ana e opozitës. Në mënyrë jo zyrtare, dje ishte rënë dakord që drafti final të kalonte për miratim në parim në Komisionin e Reformës në Drejtësi. Por në minutat e fundit, Partia Demokratike kërkoi kohë që ta shqyrtonte edhe një herë dokumentin me ndryshimet e reja. E hëna e ardhshme është lënë si afat për takimin e radhës mes PS, PD dhe LSI për votimin e dokumentit në parim. Deri të hënën situata mund të ketë ndryshuar. Por pavarësisht kësaj, ndërkombëtarët nuk do të tolerojnë më. Dje dhanë ultimatumin. Ata që nuk e miratojnë do ndëshkohen- tha Lu.

Në të vertetë nëse do të kishim parlament dinjitoz, të papërzier me krimin, nëse do kishim një drejtësi të drejtë  atëhere çdo ndërhyrje e të huajve me tone kaq të prera e të ashpra ndaj një sovrani siç parlamenti, do të ishte e pafalshme. Por  duket se një pjesë e madhe e politikës e ka “mizën në kësulë” e nuk ka dinjitetin të thotë se jemi vend sovran dhe ligjet burojnë e miratohen nga të votuarit e Sovranit-popull.

Fatkeqsisht këta deputetë kemi dhe ndaj vihuni në rrjesht dhe votoni pa bërë gek as mek !