(Botuar me 27 Janar 1998 në KOHA JONE)
Nga Armando Meta-
TIRANË – Demokratët do të rikthehen në parlament. Bojkotimit blu prej 5 muajsh, duket se përfundimisht i ka ardhur fundi. Vetë numri 1 i kësaj partie, Sali Berisha, ka deklaruar dje në konferencën e rregullt për shtyp, se vendimi për largimin nga parlamenti i PD ka qenë i diktuar, por jo përfundimtar. “Nëse një forcë politike demokratike mendon të qëndrojë jashtë parlamentit, ajo më mirë të shuhet se sa të ekzistojë”- deklaron Berisha. Janë këto fjalët që duket se do t’i hapë dritën jeshile grupit parlamentar të PD, për të zënë vendin që i takon në parlament.
Për rishikimin e qëndrimit të PD ka ndikuar deklarata zyrtare e “trojkës” Evropiane dhe deklarata e departamentit të shtetit amerikan. Në të, i bëhet thirrje PD, që t’i japë fund menjëherë bojkotit parlamentar dhe të marrë pjesë në procesin kushtetues. Këtë e konfirmon edhe Berisha: “PD do të rishohë qëndrimin e saj ndaj parlamentit dhe do të angazhohet, për të luajtur një rol të fuqishëm në parlament. Ajo do t’i dëshmojë komunitetit ndërkombëtar vullnetin e palëkundur, për një dialog të frytshëm për problemin e kushtetutës”,- sqaron Berisha.
Lideri i PD nuk harroi t’i kërkojë mazhorancës parlamentare, garantimin e të drejtave të procedurës në parlament, në mënyrë që këto hapin rrugën e bashkëpunimit dhe dialogut brenda një shoqërie demokratike. Sipas tij duhet të bëhen përpjekje të përbashkëta për të dalë nga kriza dhe në këtë kontekst, duhet të punohet për të zgjidhur problemet më të mprehta. “Ftoj qeverinë dhe koalicionin qeveritar, që të bashkëpunojmë seriozisht mbi bazën e kësaj pakete në mënyrë që të përmbushim detyrimet që rrjedhin prej saj. Kjo është në interes të vendit dhe të kapërcimit të krizës”, sqaron Berisha. Një argument tjetër që hedh kreu i demokratëve, për rishikimin e qëndrimit ndaj parlamentit është se PD nuk ka ndërmend të bëjë lojën e PS, të cilët sipas tij, kërkojnë me çdo kusht që ta kthejnë në një opozitë fasadë. Pavarësisht nga kjo nismë e re, duket se PD do të mungojë për një kohë mjaft të gjatë në Komisionin Parlamentar për Hartimin e Kushtetutës.
Në këtë konferencë, lideri demokrat ka hedhur pikëpyetje të mëdha lidhur me pjesëmarrjen e PD në këtë komision. Sipas tij, vetëm vendosja e dialogut, mund të gjejë rrugën dhe variantin më të suksesshëm për bërjen e vendit me kushtetutë. “Jemi për dialog kushtetues, si dhe ftoj kryeministrin që të ridimensionojë të gjitha qëndrimet e tij ndaj paketës së “trojkës”. Nëse një kushtetutë humbet përsëri, do të jetë një humbje shumë e madhe për ne”, deklaron Berisha. Por këto deklarata, më shumë se sa kundërshti ndaj këtij komisioni, duket se i shërbejnë më tepër një ingranimi gradual të PD në jetën parlamentare. Hapi i parë i saj, do të jetë pjesëmarrja në parlament dhe hapat e tjerë, për pjesëmarrje nëpër komisionet parlamentare, duket se do të ndërvaren nga hapat që do të hedhë mazhoranca, në përmbushjen e sugjerimeve të “trojkës”. Nisma e re e deklaruar nga Berisha pritet të diskutohet në mbledhjen e Këshillit Kombëtar të PD. Sipas disa burimeve brenda radhëve të demokratëve, rikthimi në Parlament i “Bashkimit për Demokraci” gjithsesi nuk pritet të jetë një çështje më e afërt se fillimi i pranverës.
ARMANDO META