(Botuar me 20 Korrik 1996 në KOHA JONE)
Emin Barçi: Acarohen marrëdhëniet Shqipëri-SHBA. Refuzohet takimi me zëvendëssekretarin e Shtetit
Presidenti Berisha nuk pranoi dje të takohet me zëvendës sekretarin amerikan të shtetit Timothy Ëirth duke i konvertuar në inat personal marrëdhëniet shtetërore me SHBA. Ambasada Amerikane në Tiranë lidhur me vërtetësinë e këtij fakti thotë “no coment”. Ndërsa në Departamentin e Shtetit në Uashingon përgjegjësi për Shqipërinë Undervood na konfirmon se : “ është e vërtetë që dje nuk u realizua një takim mes Presidentit shqiptar Sali Berisha dhe zëvendës sekretarit amerikan Ëirth”. Undervood nuk pranoi të japë shpjegime të mëtejshme lidhur me shkaqet e dështimit të takimit. Burime po në Uashington që nuk duan të identifikohen, tregojnë se vizita e Ëirth në Shqipëri ishte iniciativë e administratës amerikane dhe ishte parë si pjesë e një turneu që zyrtari i lartë amerikan ka ndërmarrë këtë javë në Evropë. Por “pjesa” Shqipëri e etapës evropiane të Ëirth dështoi. Burimi sqaron se Presidenti Berisha nëpërmjet një bisede telefonike të enjten ka njoftuar z.Ëirth se nuk ka kohë ta presë, pasi është i zënë me punë tepër të rëndësishme. Kujtojmë se Ëirth ka qenë në Shqipëri vetëm 2 muaj më parë pak përpara zgjedhjeve. Gjatë vizitës së tij në Tiranë ai takoi të gjitha forcat kryesore politike dhe pati një takim prej disa orësh kokë më kokë me Presidentin Berisha. Ishte vetë zëvendës sekretari Ëirth që pas takimit me Berishën deklaroi se: “Presidenti Shqiptar më garantoi që zgjedhjet e 26 Majit do të jenë krejtësisht të lira dhe demokratike”. Por më 26 Maj, zgjedhjet u kthyen në një farsë dhe administrata amerikane deri tani ka mbajtur qëndrimin më kritik ndaj regjimit të Tiranës. Qëndrimi konfrontues i Berishës ndaj SHBA nuk është i ri. Zëvendës Kryetari i Këshillit të Sigurimit Kombëtar Amerikan z.Shifter ishte i pari zyrtar i lartë amerikan që para dy vjetësh ndjeu në fytyrën e tij peshën e derës së zyrës të Berishës. Ardhur me porosi të qeverisë amerikane që të ndërmjetësonte me problemin e 5 minoritarëve të burgosur, gjatë vizitës së dytë në Tiranë, në vend të dialogut me Berishën, atij ju tregua rruga e Rinasit. Në vazhdimësi sidomos pas zgjedhjeve shtypi që pro qeveritar ka bërë sulme të egra ndaj z.Shifter. Por tashmë fatin e tij duket se po e pëson dhe Ëirth. Është e sigurtë se “punët” e shumta të Presidentit Berisha kurrsesi nuk mund të ishin shkak për anulimin e takimit. Mjafton të kujtojmë se ai ka takuar dhe sekretarë shoqatash e organizatash nga Afrika, Azia apo Amerika Latine pa asnjë ndikim në jetën politike, ekonomike dhe shoqërore të vendit. Ky vendim i Berishës duket si një inat patologjik ndaj “armikut” amerikan që i ka shpallur luftë diktaturës së vendosur më 26 Maj. Një gjë është e sigurt; diplomati i lartë amerikan do t’i paraqiste Berishës ballë për ballë vërejtjet e SHBA lidhur me zgjedhjet dhe do t’i kërkonte në emër të qeverisë amerikane përsëritjen e zgjedhjeve. Pas këtij refuzimi nuk është shumë vështirë të parashikohet klima e marrëdhënieve dypalëshe e cila nuk zbutet dot as nga prezenca e marinsave amerikanë në Bizë…
- Barçi