Është zhvilluar protesta e 121-të kundër qeverisë dhe kryeministrit Edi Rama, ku protestuesit kanë përsëritur kërkesën për dorëheqjen e tij dhe për një “kontratë të re sociale”.
Gjatë fjalës së saj, aktivistja Sidorela Vatnikaj deklaroi se përgjegjësia për një sërë skandalesh të denoncuara publikisht duhet të lidhet, sipas saj, me drejtimin politik të vendit. Ajo përmendi zhvillimet e fundit që lidhen me institucionet e sigurisë, si dhe raste të mëparshme që kanë përfshirë zyrtarë të lartë të qeverisë.
Vatnikaj tha se protestuesit nuk kërkojnë vetëm largimin e kryeministrit, por edhe hetimin e tij nga organet e drejtësisë për çështje që ajo i konsideron përgjegjësi politike dhe penale.
“Përgjegjësi kryesor, ne e dimë që është Edi Rama”, u shpreh ajo, duke shtuar se protesta do të vijojë me kërkesën për një ndryshim të marrëdhënies mes qytetarëve dhe institucioneve.
Në fjalën e saj, aktivistja përmendi gjithashtu emra të tjerë të politikës shqiptare dhe pretendime për korrupsion e lidhje me krimin e organizuar, duke kërkuar që këto çështje të hetohen nga drejtësia.