Operacioni “Bregdeti ynë”, prej mëngjesit të kësaj të mërkure ka nisur kontrollet dhe verifikimet në territorin e plazhit të Durrësit. Kontrolli ka filluar nga Përroi Agait në drejtim të vendit të quajtur “Plepa”, dhe kontrollet do të vazhdojnë në të gjithë vijën bregdetare. Si rezultat i kontrolleve deri në këto momente janë evidentuar 7 parcela pa leje, ku janë hequr rreth 290 shezlongë dhe rreth 141 çadra.
Një ditë pas ultimatumit të kryeministrit Edi Rama, sot në mëngjes nisi aksioni furtunë për pastrimin e plazhit nga shezlongët dhe çadrat që janë pa leje. Në një konferencë për shtyp, kreu i qeverisë paralajmëroi subjektet që t’i lironin vetë hapësirat e zaptuara pa leje, ose në të kundër do të largohen me pahir dhe do i konfiskohen të gjitha çadrat e shezlongët, për të mos iu kthyer më.
Aksioni po vijon edhe në Vlorë, si dhe është shtrirë në Orikum, Zvërnec e Plazhin e Vjetër, ku policia ka nisur verifikimin e dokumentacionit të subjekteve, ndërsa në Fier aksioni ka nisur në vijën bregdetare të Semanit dhe Darëzezës. Aksioni i policisë ka bezdisur jo pak pushuesit, të cilët kanë shprehur pakënaqësi, duke kërkuar që të paktën të ishin lajmëruar një ditë më parë.
Mesnatën e së shtunës, konflikti për shfrytëzimin e lejes së plazhit çoi në katër viktima dhe dy të plagosur në Velipojë.