Deputeti i PD-së, Belind Këlliçi ka risjellë një video ku kreu i grupit parlamentar i PS-së, Taulant Balla, atëherë në opozitë shprehej kundër zhvillimit të Zvërnecit. Në videon e publikuar Balla shprehet: “Sot jemi në një ndër plazhet më të bukura dhe sigurisht në të vetmit që kanë mbetur ende të virgjër, ende i pashfrytëzuar. Kodra përballë bën pjesë në një prej pronave të ushtrisë shqiptare të cilën Arben Imami po e bën gati edhe këtë për ta shitur. Bëhet fjalë për repartin e ish-Artilierisë bregdetare që fillon prej Pusit të Mezinit në Vlorë, në Nartë dhe në Zvërnec, prej 209,300 metër katror”, thotë Balla në video. Këlliçi ironizon Ballën dhe deklaron se sot Balla ndryshe nga atëhherë po përdoret si pushka kryesore kundër protestuesve që janë ngritur kundër arrogancës.
Postimi i plotë
Ja si ka ndryshuar komisari i partisë, ai që e do partinë më shumë se Shqipërinë, më i zellshmi kundër protestuesve në Tiranë!
Në opozitë ishte kundër zhvillimit të asaj zone. Sot shfaqet dhe si ekonomist e flet për përfitimet që do ketë vendi. Jo vetëm kaq por është dhe pushka kryesore e Ramës ndaj atyre që janë ngritur kundër korrupsionit dhe arrogancës.
Madje arrin deri në akuza se protestuesit paqësorë dhe rinia shqiptare, ështe e shtyrë herë nga Moska, herë nga Teherani, herë nga Beogradi ose Athina, për të protestuar kundër korrupsionit të Edi Ramës!
Kur e cakton Edi Rama se ku do ndërtohet, kush do e marrë, kush do hedhë paratë, kush do bëjë projektin, atëherë sipas Taulant Ballës jemi Shqipëria europiane.
Për qëndrime si këto, fytyra si Balla janë të urryera sot në publik dhe në çdo trevë ku flitet shqip.