Nga Ben Blushi –
Bashkim Fino ishte socialisti më i dashur që mund të njohësh, Kryeministri më optimist që mund të takosh dhe miku më i ndershëm që mund të kesh.
Bashkim Fino ishte politikani i vetëm që e dinte gjithnjë vendin e vet, që nuk kërkonte kurrë vendin e dikujt dhe askush nuk merrte dot vendin e tij.
Me Bashkimin çdo fitore ishte e sigurt dhe çdo humbje ishte një fitore, qofte ajo një domino, një ndeshje apo një palë zgjedhje kombëtare.
Aftësia më e rrallë e Bashkimit ishte ekuilibri që gjente mes gjërave, që në vendin tonë quhen të medha, si politika, ligjëvënia, influenca dhe shteti dhe gjërave që bëjnë jetën e përditshme të njeriut dhe qe prandaj duken të vogla, si nderet ndaj miqve, një telefon, një ngushëllim, një gol, një kollaro apo një puro.
Bashkim Fino i kushtohej me të njëjtin pasion dhe frymëzim si rishikimit të një ligji ashtu edhe një kampionati futbolli, si një fjalimi në Parlament, ashtu edhe lidhjes së një kollareje, si ndryshimit të një qeverie edhe ndryshimit të një rregulloreje futbolli.
Nëse ka fjale që e sintetizon Bashkim Finon është përpikmëria. Bashkimi ishte njeriu më i përpiktë që kam njohur.
Ishte i përpiktë si mik, si shok, si burrë, si fëmijë, si politikan, si tifoz, si kundërshtar, si duhanxhi, si tekanjoz, si kokëfortë, si mbështetës, si kandidat, si pacient dhe jam i bindur si baba dhe si bashkëshort.
Përpikmëria e tij ishte ngjitëse, dominuese dhe e pakonkurrueshme. Bashkim Fino na mundi të gjithë si një mik i përpiktë dhe prandaj iku si fitimtar.
Duke nxituar për të qenë i përpiktë si çdo herë, dje u nis më herët dhe arriti më shpejt se ç’duhej.
Arriti gjithë hir sapo u thirr si bir!
Lexoni edhe…
- Presidenti Meta: Fino ishte shumë njerëzor, shumë bujar, shumë zemërgjerë, tolerant dhe dinte të dallonte marrëdhëniet politike nga raportet njerëzore
- Institucioni i Presidencës ul flamurin në gjysmë shtize në nderim të ish-kryeministrit Bashkim Fino
- Rama flet për Finon: Kishte bërë një operacion, kemi ardhur për të ikur nga kjo botë
- Balla përlotet “live” në TV teksa merr lajmin për ndarjen nga jeta të Bashkim Finos
- Ditë zie për Bashkim Finon, anulohet takimi i Bashës në Fier
- Mimi Kodheli kujton periudhën e Fakultetit me Bashkim Finon: Jam e sigurt që do takohemi sërish
- Politikani që i çarmatosi shqiptarët me buzëqeshje!
- Saimir Tahiri kryen homazhe në nder të Bashkim Finos
- Ambasada e SHBA mesazh për Finon: Do të kujtohet për udhëheqjen e qeverisë së pajtimit kombëtar
- Flamur Noka mesazh për Bashkim Finon: Humbje që na ka tronditur të gjithëve
