Thethi vijon që të vizitohet nga turistët e huaj edhe këtë shtator, edhe pse ka ulje të temperaturave. Kryetari i Bashkisë së Shkodrës, Benet Beci ka ndarë pamjet me turistët e shumtë që ndodhen në Theth, ku shpreh edhe falënderimet për të gjithë ata që kanë zgjedhur të vizitojnë Thethin.
Vitet e fundit në Theth janë shtuar strukturat mikpritëse. Në shumicën e rasteve janë kullat e vendasve të kthyera në bujtina, që kanë pritur vizitorë nga të gjitha anët e globit. Kryesisht turistët e huaj që vizitojnë Thethin, preferojnë të përshkojnë një shteg që kalon në lartësinë 1795 metrave, për të shkuar në Valbonë ose anasjelltas.
Fshati shtrihet në lartësinë 850 metra mbi nivelin e detit. Si shumica e Alpeve shqiptare, parku mbizotërohet nga shkëmbinj gëlqerorësh dhe dolomitesh.
