Albert Vataj
“Takim i shkëlqyer në Shkodër”, kështu e ka quajtur Ben Blushi prezantimin që i bëri në këtë qytet romanit të tij më të fundit, “Parajsa Artificiale”.
Në vijim të turit prezantues, Shkodra ishte ndalesa e radhës për shkrimtarin, i cili nuk e fshehu admirimin për këtë qytet me një traditë të rrënjosur të letrave dhe kulturës. “Shkodra nuk të zhgënjen asnjëherë, as kur bën ftohtë, as kur bie shi, as kur është me Pashkë apo me Ramazan,” shkroi ai në një postim në Facebook, duke vlerësuar mikpritjen dhe frymën e hapur të lexuesve shkodranë.
Në ambientet e Qendrës Arka, Blushi u takua me shumë miq të rinj dhe të vjetër për të diskutuar mbi tematikat e guximshme dhe provokuese të romanit të tij, duke u ndalur veçanërisht në raportin mes teknologjisë dhe natyrës njerëzore, një temë kyçe e veprës. “I falënderoj të gjithë për pyetjet e shumta dhe të thella. Me këtë rast, po ndaj edhe disa fotografi nga takimi,” shkroi ai në përmbyllje të postimit.
Në një kohë kur libri duket se po humb gjithnjë e më shumë terren në shoqërinë e sotme të shpejtë dhe të fragmentuar, angazhimi i autorëve për të krijuar hapësira dialogu me lexuesit është më i rëndësishëm se kurrë. Ben Blushi, si pak shkrimtarë të tjerë, refuzon të dorëzohet përballë këtij realiteti dhe beson se libri mund të rigjejë vendin e tij, jo duke u ankuar për krizën e leximit, por duke e përballuar atë me praninë e tij, me fjalën e tij, me dëshirën për të ndezur debate dhe kureshtje.
Në këtë kuptim, “Parajsa Artificiale” nuk është thjesht një roman, por një reflektim mbi botën, në të cilën jetojmë dhe mbi zgjedhjet që na formësojnë, një ftesë për të menduar se çfarë do të thotë të jesh njeri në një epokë të dominuar nga algoritmet dhe inteligjenca artificiale.