Presidenti i Këshillit Evropian, Antonio Costa, ka vlerësuar procesin e zgjerimit të Bashkimit Evropian, duke e cilësuar atë si një prej investimeve më të mëdha gjeopolitike të Evropës.
Duke folur në Forumin “Teha” në Cernobbio të Italisë, Costa tha se zgjerimet e mëparshme kanë forcuar demokracinë, sundimin e ligjit dhe prosperitetin, ndërsa zgjerimi i ardhshëm me Ukrainën, Moldavinë dhe vendet e Ballkanit Perëndimor do ta fuqizojë më tej BE-në në aspektin gjeopolitik.
“Kjo është një histori suksesi evropiane dhe ne duhet ta pranojmë me besim”, u shpreh Costa.
Ai hodhi poshtë gjithashtu pretendimet se Evropa ndodhet në rënie, duke pranuar se BE-ja duhet të rrisë konkurrueshmërinë dhe të jetë më e shpejtë e më e bashkuar në vendimmarrje.
Costa është një prej mbështetësve të anëtarësimit të Shqipërisë në BE deri në vitin 2030. Ai e ka cilësuar zgjerimin si një domosdoshmëri strategjike për Unionin dhe Shqipërinë si një prej vendeve që po ecën në drejtimin e duhur drejt anëtarësimit.