Deputetja e Partisë Socialiste, Sara Mila, foli për protestën e dhunshme para Kuvendit një ditë më parë, ku tha se deputetët janë përballur me një revoltë të disa personave, që sipas saj, nuk duhet të konsiderohen si “pjesë e protestës paqësore që zhvillohet para Kryeministrisë”.
“Deputetët janë ndeshur me një revoltë të disa njerëzve që nuk do doja t’i quaja pjesë e protestës, se të veshësh petkun e lirisë së kësaj proteste dhe të shkosh për të dhunuar fizikisht dhe verbalisht deputetët,” u shpreh ajo.
Në emisionin “3D” në RTSH, deputetja Mila shtoi se në çdo protestë mund të ketë momente tensioni, por sipas saj situata lidhet me çorientim dhe humbje të fokusit nga ana e protestuesve.
“Ka edhe këto ngjarje dhe momente kur ka revoltë pak më të madhe nga qetësia e përhershme apo sosja e durimit të disa njerëzve, por çështja është te një çorientim, një humbje e busullës” tha ajo.
Duke iu referuar kërkesave për rrëzimin e qeverisë, deputetja e PS theksoi se ndryshimi i qeverisë bëhet vetëm përmes votës.
“Çfarë po kërkohet dhe si po kërkohet? Qeveria rrëzohet me votë dhe kjo qeveri ka vetëm një vit që është mandatuar,” deklaroi Mila.
Deputetja Mila ka komentuar pjesëmarrjen e qytetarëve nga Kosova në protestat e fundit, duke theksuar se ata nuk mund të konsiderohen pjesë e diasporës shqiptare.
Mila u shpreh se shumica e personave që kanë ardhur nga Kosova janë shtetas të Kosovës dhe jo pjesë e diasporës.
“Sa i përket orkestrimit të situatës me diasporën, vëllezërit tanë nga Kosova nuk janë diasporë. Shumica e atyre që kanë ardhur janë nga Kosova,” tha ajo.
Duke folur për votën e diasporës shqiptare, deputetja e PS-së theksoi se qeveria u dha emigrantëve mundësinë të votojnë dhe se mbi 120 mijë prej tyre mbështetën Partinë Socialiste.
“Sa i përket diasporës, mbi 120 mijë persona kanë votuar për Partinë Socialiste. Ishte kjo qeveri që i dha diasporës mundësinë të flasë me votë dhe ajo foli në maj të vitit të kaluar,” deklaroi Mila.