Ministri i Jashtëm gjerman Heiko Mass, pritet që të vizitojë Turqinë, kjo për bisedime mbi konfliktin që vendi ka me Greqinë, për çështjen e kërkimeve në Mesdheun Lindor. Sipas mediave të huaja, Mas do të takojë homologun e tij turk, Mevlut Çavusoglu. Gjermania është përpjekur të ndërmjetësojë midis dy vendeve, pasi Maas ka vizituar dy herë vendin verën e kaluar.
Turqia dhe Greqia do të vazhdojnë bisedimet e tyre në 25 janar në lidhje me zgjidhjen e mosmarrëveshjes mbi të drejtat e kërkimeve. Athina akuzon Ankaranë për eksplorimin e rezervave të gazit në territorin detar që i përket Greqisë. Ndërsa nga ana tjetër Ankaraja thotë se territori i përket Turqisë.
Nga ana tjetër është folur dhe për një ndërmjetësim nga ana e kryeministrit Edi Rama, ku ministri i jashtëm turk Mevlüt Çavuşoğlu, ka konfirmuar se ky i fundit ka propozuar që të takohet me homologun grek Nikos Dendias në Tiranë. Po ashtu është diskutuar dhe për një takim Erdogan-Mitsotakis, por si fillim me shumë mundësi do të jenë ministrat e jashtëm që do ulen në dialog këtë janar.
