Vetëm pak ditë pas raportit të televizionit italian Rai 3 që fliste për një rikthim të kultivimit të kanabisit në Shqipëri, drejtori i policisë së Shkodrës pranon se fenomeni mbetet prezent ndonëse në një formë tjetër. Kultivimi I lëndës narkotike sipas tij po tentohet me parcela të vogla në zonat e thella malore ku policia e ka të vështirë patrullimin me mjetet që ka në dispozicion. Për këtë arsye kryepolici i qarkut ka kërkuar dyfishim të fluturimeve monitoruese në qarkun e Shkodrës.
Për herë të parë një zyrtar i lartë i Policisë së Shtetit pranon ekzistencën e fenomenit të kultivimit të kanabisit në Shqipëri, ndërsa sqaron se strategjia e grupeve kriminale ka ndryshuar.
Vetëm pak ditë pas reportazhit të televizionit italian, RAI 3, që fliste për 12 fishim të kultivimit, të mohuar nga qeveria, drejtori policisë së qarkut Shkodër pranon se fenomeni ekziston edhe pse në një formë tjetër.
Kanabisi, sipas Niko Brahimajt, tashmë po kultivohet me parcela të vogla, por të shpërndara në zona të thella ku prania e policisë është më e vështirë.
Kjo është arsyeja përse për vitin 2020, është kërkuar dyfishim i fluturimeve monitoruese mbi zonat e thella në Shkodër.
Niko Brahimaj: Jemi të bindur që do të jenë më tepër se 14 ose ndoshta 16 fluturime, monitorime nga ajri. Fenomeni ka ndryshuar, tani nuk kemi më parcela masive por kemi grupime të vogla dhe të shpërndara në shumë zona të thella. Është e vërtetë që terreni është shumë i vështirë.
Ndihmë policisë do ti vijnë edhe mjetet e reja të tonazhit të lartë, 10 të tilla brenda marsit.
Por Brahimaj kërkon bashkëpunim nga të gjithë me qëllim që forca goditëse të jetë efikase.
Niko Brahimaj: Nuk është e mundur që një person nga Fushë Kruja apo rrethe të tjera fqinje të vijë dhe të kultivojë në Malësinë e Shkodrës, qoftë në Pult apo Shoshë. Dikush është garantues, udhërrëfyes.
Ndërsa përfaqësuesit e pushtetit vendor flasin për vështirësite që ka kjo luftë, nga infrastruktura, tek pagat e ulëta për kryepleqtë e deri tek burokraci te tjera.
Kultivimi i kanabisit në zonat e thella malore ku policia e ka të vështirë të arrijë, nisi pasi policia intensifikoi luftën ndaj fenomenit, por që siç duket beteja ende nuk është fituar.
/Ora News