Një tërmet me magnitudë 4.1 ballë është regjistruar në orën 10:37 në zonën detare midis Santorinit dhe Amorgos.
Sipas të dhënave paraprake nga instituti gjeodinamik i Observatorit Kombëtar të Athinës, epiqendra e tërmetit ishte 27.1 km (16.8 milje) në veri-verilindje të Thira, në një thellësi prej 4 km (2.5 milje). Megjithatë, analiza e rishikuar e vendos epiqendrën 22 km (13.7 milje) në jug-jugperëndim të Arkesinit, Amorgos.
Për shkak të rritjes së aktivitetit sizmik në rajon, shkollat në ishullin e Santorinit do të qëndrojnë të mbyllura të hënën dhe banorët këshillohen të shmangin grumbullimet e mëdha në hapësira të mbyllura. Qasja dhe prania në portet Ammoudi dhe Fira e Vjetër duhet të shmanget.
Një sizmolog grek siguroi publikun të shtunën se një seri tërmetesh të regjistruara kryesisht gjatë javës së kaluar në zonën e kalderës së Santorinit ka të ngjarë të jenë rezultat i lëvizjeve tektonike dhe jo aktivitetit vullkanik.
Dhjetra lëkundje u regjistruan të shtunën, ku më të mëdhatë ishin me magnitudë 4-4.4, sipas Institutit Gjeodinamik të Observatorit Kombëtar të Athinës, njofton “Ekathimerini”. Lëkundjet ndodhën 35.2 dhe 26 kilometra në lindje-verilindje të Santorinit dhe kishin një thellësi prej dy deri në pesë kilometra.
Aktiviteti postsizmik në zonë është intensiv, me lëkundje të dobëta me magnitudë 2-3 ballë që ndodhin në intervale minutash.
“Në të vërtetë ka shumë tërmete, veçanërisht në javën e fundit. Që nga fillimi i janarit, por kryesisht në javën e fundit, më shumë se 150 deri në 200 tërmete, [por] pak janë regjistruar pikërisht në ishullin e Santorinit. Shumica janë në një distancë në verilindje, rreth 10 deri në 30 kilometra larg”, tha për transmetuesin shtetëror ERT sizmologu grek Gerasimos Papadopoulos, drejtor i kërkimit në Institutin Gjeodinamik.
“E rëndësishme është se nga ekzaminimi që kemi bërë nuk del se janë tërmete vullkanike. Me fjalë të tjera, nuk janë tërmete që lidhen me disa procese vullkanike në nëntokë, nën vullkan ose rreth vullkanit. Janë tërmete thjesht tektonike, të llojit që mund të ndodhin në çdo rajon tjetër të vendit,” shpjegoi ai.
Të mërkurën, ministri i mbrojtjes civile i Greqisë thirri një takim me zyrtarë lokalë dhe të reagimit ndaj fatkeqësive për të diskutuar “aktivitetin e butë sizmiko-vullkanik” në zonën e Santorinit, sipas një njoftimi të ministrisë.
Aktiviteti i fundit vullkanik është i ngjashëm me atë të viteve 2011-2012, i cili zgjati rreth 14 muaj dhe përfundoi pa një ngjarje vullkanike, tha ministria në një njoftim.
Ishulli në formën e gjysmëhënës i Santorinit është një nga destinacionet turistike më të njohura të Greqisë, duke tërhequr vizitorë nga e gjithë bota.
Prg: Koha Jonë