Prej 10 vitesh në krye të Bashkisë së Korçës, kandidati socialist Sotiraq Filo u kërkon qytetarëve një mandat të tretë për të përfunduar projektet e nisura dhe për të realizuar premtimet e reja elektorale. Ai tha se garancia dhe suksesi i tij janë bilanci pozitiv i projekteve të realizuara dhe programi ambicioz për të ardhmen. Nga gazifikimi te termoizolimi, infrastruktura dhe aeroporti i Lumasit, ai foli konkretisht për projektet që pret të realizojë këtë mandat.
“Kemi projektin e gazifikimi, është projekti më i madh infrastrukturor që kemi përmbyllur ndërhyrjet në infrastrukturën bazë, dhe u japim familjeve një alternativë të përballueshme për ngrohjen, të eliminojmë ndotjen në dimër dhe të krijojmë premisa për biznese ekzistuese dhe bizneset e reja. Gazifikimi nuk është premtim në letër kemi filluar punën prej muajsh, kemi mbështetjen e qeverisë që ka përcaktuar Korçën si qytet pilot. Unë pres që në harkun e një viti ky projekt të zbatohet. kjo na është premtuar edhe nga kompania.
Aeroporti i Lumalasit është një prej projekteve tona të kësaj fushate, dhe për këtë projekt kemi filluar punën, nuk është premtim i ri, por projektet duan kohën e tyre. Kemi nënshkruam marrëveshjen me FSHZH, dhe Federatën e Aeronautikës që do të realizojmë menaxhimin e aeroportit, duke shtuar një atraksion apo produkt turistik. Krahas gazifikimit është edhe termoizolimi i fasadave të qytetit të Korçës. Kemi ndërhyrë në 12 objekte në 3 pika të qytet dhe kemi parë impaktin pozitiv, ul koston e ngrohjes rrit vlerën e pronës dhe qyteti përmirësohet nga ana vizuale estetike.
Qyteti i Korçës ka stokun më të madh me shumë apartamente në bashkëpronësi, po punojmë për të siguruar financimet e nevojshme. Investimet tona kanë qenë të shtrira nga qendra në periferi, do shtrohen mbi 25 mijë m2 asfalt në fushën e druve, rikonstruksion i rrjetit të kanalizimeve dhe po punojmë në disa zona informale të qytetit. Ka qenë një punë e shtrirë në vite që ka prekur gjithë qytetin. Bashkia ka qenë në punë dhe nevojat të mëdha. Vëmendja jonë për infrastrukturën në fshat do të jetë në mandatin e ardhshëm”,-tha për ”A2cnn”.
Filo tha se prej vitesh Korça e ka ta garantuar furnizimin me ujë të pijshmë, ndërsa problematikë është mungesa e personelit shëndetësor. Ky shqetësim i banorëve sipas tij do të adresohet në strukturat përkatëse. “Problematikë janë mjekët ka mungesë të personelit shëndetësor që duhet të adresohen nga strukturat përgjegjëse është një shqetësim që e kam marrë nga banorët. Ne duhet të lobojmë që situat me personelin mjekësor të përmirësohet”.
Në programin e tij fokusi do të jetë te fermerët, ku po punohet për regjistrin e tokave bujqësore, ndërkohë që vëmendje do të ketë edhe tregu i shitjes. Afati konkret është mandati i ardhshëm. Kryebashkiaku socialist përjashtoi dhënien e lejeve abuzive të ndërtimit në këtë qytet dhe foli për projektet që do të mbajnë të rinjtë në qytet.
“Korca është qyteti më i mbrojtur në Shqipëri dhe fakti që ne kemi qenë të kujdesshëm si e kemi zhvilluar pas viteve ‘90 po na kthehet në aset për zhvillimin e sektorit të turizmit. Aseti kryesor është që jemi qytet i mbrojtur dhe bashkë me trashëgiminë kulturore e bëjnë Korçën të jetë qendër e rëndësishme e turizmit në Shqipëri. Kemi filluar një program të madh për ta kthyer Korçën në qendër të teknologjisë e inovacionit të trajnojmë të rinjtë e të rejat që të kenë mundësi të qëndrojnë këtu dhe të kenë mundësi të punojnë. Kemi dhjetëra të rinj që trajnohen, që qëndrojnë dhe punojnë këtu. Po ndërhyjmë me disa projekte për trajnimin e fushave të ndryshme të teknologjisë dhe incentiva që do t’ua ofrojmë bizneseve për t’u vendosur në Korçë”.
Sa i takon punësimit në bashki, që e kalon numrin 1000, Filo thekson se ai është në raport me nevojat, pas reformës territoriale dhe asaj të decentralizimit. “Aktualisht janë rreth 1 mijë punonjës të punësuar në bashki. Nuk është shifër e fryrë duke marrë parasysh zgjerimin e territorit të bashkisë, reforma administrative territoriale dhe decentralizimin e kompetencave dhe këto funksione kërkojnë staf. Morëm administrimin e kopshteve dhe çerdheve janë 300 personel. Të punësuarit në raport me nevojat. Nuk kemi pasur punësime me karakter elektoral”,-tha kandidati.