Një sistem i fshehtë komunikimi i përdorur nga kriminelët për të tregtuar drogë dhe armë është “zbuluar me sukses”, thotë Agjencia Kombëtare e Krimit (NCA) në Britani.
NCA punoi me forca në të gjithë Evropën në operacionin “më të madh dhe më domethënës” të zbatimit të ligjit në Mbretërinë e Bashkuar.
746 arrestime u kryen në mbarë Evropën pasi mesazhet në EncroChat u përgjuan dhe deshifruan.
Më shumë se dy ton drogë, disa duzina me armë dhe 54 milionë paund kesh janë sekuestruar, thotë NCA.
Oficerët thuhet se kanë penguar vrasje pas monitorimit të fshehtë të sulmeve të planifikuara dhe kërcënimeve për jetën në shërbimin e koduar.
NCA thotë se operacioni në mbarë Evropën, i cili zgjati mbi tre muaj dhe përfshiu forcat e policisë në të gjithë Mbretërinë e Bashkuar, ka pasur ndikimin më të madh që kemi parë ndonjëherë tek bandat e krimit të organizuar.
Komisioneri i Policisë Metropolitane, Dame Cressida Dick, forca e së cilës bëri 132 arrestime dhe sekuestroi 13.3 milionë paund kesh, e përshkroi atë si një operacion që “ndryshon rregullat e lojës”.
Ajo tha: “Ky është vetëm fillimi. Ne do të prishim rrjetet e organizuara kriminale si rezultat i këtyre operacioneve në javët, muajt dhe ndoshta vitet që do të vijnë”.
Rreth 60,000 njerëz, mes tyre deri në 10,000 në Britani, ishin abonuar në EncroChat me qendër në Francë, e cila tani është zhdukur.
Sistemi funksiononte në telefonat Android të përshtatur dhe, sipas uebfaqes së tij, siguronte “komunikime të sigurta pa shqetësime”.
Konsumatorët kishin qasje në karakteristika të tilla si mesazhe vetë-shkatërruese që fshihen nga pajisja e marrësit pas një kohe të caktuar kohore.
Kishte gjithashtu një fshirje emergjence, ku të gjitha të dhënat në pajisje mund të fshiheshin duke futur një kod katër-shifror.
NCA thotë se sistemi i mesazheve është përdorur si një “treg kriminaliteti” për të bashkërenduar furnizimin e drogave të klasit A në të gjithë botën, dhe importimin e armëve duke përfshirë pushkë, mitralozë, pistoletat dhe granata.
Agjencitë e zbatimit të ligjit filluan të marrin të dhëna nga faqja në 1 Prill pasi kodi i enkriptimit besohet të jetë thyer në mars.
Bandat gjithashtu besohet se kanë përdorur pajisjet për të komplotuar sulme ndaj grupeve rivale, për të planifikuar mënyra për të marrë mbrapsht borxhet e drogës dhe për të planifikuar pastrimin e parave.
Kërcënimet për jetën të detajuara në këtë faqe përfshinin sulme me acid dhe kërcënime për të prerë gjymtyrët.
Dhjetëra grupe të krimit të organizuar janë shkatërruar, thotë NCA, me shumicën e arrestimeve në Londër dhe veri-perëndim të Anglisë
Mbyllja për shkak të koronavirusit “funksionoi në favorin tonë”, thotë agjencia, pasi shumë të dyshuar ishin në shtëpi kur u bastisën dhe arrestuan.
Shumë prej të arrestuarve thuhet se formojnë “nivelin e mesëm” të bandave të krimit, ndërsa disa përshkruhen si “zoti ose zonja “Big”” i nëntokës.
EncroChat shiti telefonat e enkriptuar me një garanci anonimiteti, me një sërë karakteristikash speciale për të fshirë informacionin identifikues. Vetë telefonat kushtojnë afro 900 paund secili, me një pajtim që kushton 1.350 paund (1.500 €) për gjashtë muaj.
Europol tha se policia franceze kishte zbuluar disa nga serverët e EncroChat ishin vendosur në Francë, dhe se kishte mundur të vendoste një “pajisje teknike” për të intenceptuar mesazhet.