Për të dhjetën ditë radhazi, qytetarët vijojnë me protestën kundër investimit në Zvërnec. Ata kanë nisur grumbullimin në sheshin ”Skënderbej”, vendtakimin e përhershëm të orës 18:00 përpara se t’i drejtohen së bashku Kryeministrisë. Gjatë rrugës për tek Kryeministria, atyre u bashkohen protestues të tjerë apo edhe ata që i presin tashmë para institucionit. Po ashtu në shesh do të jenë të pranishëm edhe gazetarët e ardhur nga Europa, të cilët edhe zhvilluan një konferencë për shyp me kryeministrin Edi Rama. Pas 5 kërkesave, sot u shtua edhe një e 6-të, që ka të bëjë me qeverinë tranzitore.
Protestuesi Arbër Lleshi nga Mati shprehu shqetësimin për largimin e shqiptarëve nga vendi, vështirësitë ekonomike, si dhe për gjendjen e banorëve të Kurdarisë, të cilët sipas tij prej 40 vitesh jetojnë pa rrugë dhe ujë të pijshëm, ndërsa uji i zonës po u merret për t’u dërguar në hidrocentralet, sipas tij, të lidhura “me qeverinë e korruptuar të Edi Ramës”.
Një vajzë e re, e cila ka ardhur posaçërisht nga jashtë për t’iu bashkuar protestës, e quajti këtë ngjarje një moment historik. Ajo tha se sot shënohet fundi i tranzicionit të tejzgjatur, ndërsa bëri thirrje që më shumë qytetarë t’u bashkohen. ”Për herë të parë në 35 vite shqiptarët bëhen bashkë. Është moment historik, sepse shqiptarët dëshmojnë se Shqipëria është mbi gjithçka. Për herë të parë tregojnë se nuk nëpërkëmbën dot nga askush, sepse po shpaloset fytyra më dinjitoze e Shqipërisë. Sot shënojmë fundin e tranzicionit të tejzgjatur. Sot, fytyra europiane e Shqipërisë është kjo protestë, jeni ju. Sot Shqipërisë i dalim vetë për zot! Prandaj gjej rastin të bëj thirrje për çdo shqiptar që s’është ende këtu të na bashkohet përditë këtu në bulevard, sepse është një përjetim që i takon kujtdo që e do Shqipërinë vërtet. Uroj që Zoti ta bekojë Shqipërinë, por bekimi i Shqipërisë është kjo protestë, jeni ju”, tha protestuesja.
Një protestues i ardhur nga Gjermania për protestën kundër investimeve në Zvërnec, i cili në bluzë ka të mbishkruar frazën “Diaspora është me ju”, nga Kryeministria u bëri thirrje intelektualëve të formojnë një front politik. ‘‘Shqipëria nuk është pronë private, por atdheu gjithë shqiptarëve kudo që ndodhen! Unë e kam lënë vendin tim kur kam qenë 18 vjeç, por sot jam kthyer këtu sepse vendi ynë ka nevojë për ne! I bëj thirrje diasporës të vijë këtu me ne! U bëj thirrje gjithë intelektualëve në Shqipëri, bëni një front politik kundër. Të gjithë duhet të jenë këtu”, tha protestues.
Kurse një zonjë ngriti shqetësime për shitjen e tokave, ligjin për investitorët e huaj dhe projektet në Skavicë, Nartë e Sazan, ndërsa iu drejtua mediave të huaja në gjuhën angleze duke thënë se lëvizja qytetare është bashkuar nga zhgënjimi që qytetarët kanë ndaj të gjitha qeverive, si të majtë ashtu edhe të djathtë.
6 kushtet
Dorëheqjen e qeverisë.
Shfuqizimin e statusit dhe kuadrit ligjor që lidhet me investitorët strategjikë.
Shfuqizimin e Paketës së Maleve.
Anulimin e ndryshimeve në ligjin për zonat e mbrojtura.
Anulimin e ndryshimeve në ligjin për trashëgiminë kulturore shqiptare.
Qeveri tranzitore.
