Protestat që kanë nisur prej disa ditësh në Tiranë dhe qytete të tjera të vendit janë shtrirë sot edhe në Lezhë, ku qytetarë të shumtë janë mbledhur në qendër të qytetit për të shprehur pakënaqësitë e tyre.
Gjatë tubimit, qytetarët marshuan në rrugët kryesore të qytetit me pankarta dhe thirrje kundër qeverisë. Organizatorët kanë paralajmëruar se protestat nuk do të ndalen këtu, por do të vijojnë edhe në ditët në vijim. Fillimisht të nisura kundër një projekti investimi në Zvërnec në Vlorë, protestat janë zgjeruar gradualisht duke përfshirë edhe kërkesa më të gjera sociale dhe ekonomike.
“Shqipërinë po e ndajnë në copa”, ishte shqetësimi i artikuluar në Fushë-Krujë, ku disa qytetarë u mblodhën në protestë kundër qeverisë. Me flamuj në duar dhe pankarta kundër Edi Ramës, protestuesit, mes të cilëve burra, gra dhe fëmijë, mbajtën fjalime të shkurtra ku shprehën pakënaqësinë e tyre ndaj establishmentit politik.
