Falë investimit të ri në shërbimin e Okulistikës, Spitali Rajonal i Elbasanit siguron tashmë ndërhyrjet në sy dhe lentet falas për të moshuarit. Drejtuesi politik i qarkut Elbasan Damian Gjiknuri bashkë me Ministren e Shëndetësisë dhe Mbrojtjes Sociale, Ogerta Manastirliu, si dhe kryebashkiaku Gledian Llatja u njohën nga afër me transformimin që i është bërë këtij shërbimi. “Si përfaqësues politik i zonës së bashku me njerëzit që përfaqësojnë qytetarët duam t’ju falenderojmë për këtë investim. Unë kam qenë dëshmitar i disa vizitave së bashku me ju këtu. Çdo muaj këtu shihen ndryshime dhe Spitali Rajonal i Elbasanit ka një transformim tërësor. Është një punë që s’ka përfunduar dhe vetë e thatë që ne do të vazhdojmë ta mbështesim dhe ky është një lajm i mirë për të gjithë qytetarët”, tha Gjiknuri.
Ministrja e Shëndetësisë dhe Mbrojtjes Sociale Ogerta Manastirliu u shpreh se 3700 të moshuar kanë përfituar nga paketa e kataraktës gjatë 2022 në 8 spitale, pjesë e paketave shëndetësore falas për qytetarët.
“Është bërë një investim për pajisjet e reja në shërbimin e okulistikës, për të kryer paketën e kataraktit, që tashmë ofrohet në shtet falas, në Tiranë, por edhe në Spitalet Rajonale, edhe në Elbasan sigurisht. Ne e kemi filluar përpara 3 vitesh përpjekjen për të shtrirë shërbimet, mirëpo nevojiteshin pajisje të reja, pajisje të cilat janë të fjalës së fundit të teknologjisë, për të kryer të gjithë ciklin e ndërhyrjeve operatore. Patjetër që është e rëndësishme sepse kjo patologji prek të moshuarit dhe janë ata që edhe e vuajnë pjesën e pagesave nëse nuk realizohet kjo ndërhyrje në publik dhe falas”, deklaroi Manastirliu.
Mjekët e cilësuan një investim gjigant të kryer në Spitalin Rajonal të Elbasanit që për herë të parë merr pajisje të tilla moderne.
