Protestat e dhunshme të zhvilluara në Tiranë kanë sjellë pezullimin e përkohshëm të transportit publik në Tiranë dhe në Kamëz. Vendimi është marrë pas incidenteve të regjistruara gjatë protestës, ku disa mjete të transportit urban janë sulmuar dhe dëmtuar, duke i bërë ato të pamundura për të vijuar normalisht qarkullimin.
Sipas informacioneve, dëmtimet e shkaktuara në autobusë, përfshirë thyerjen e xhamave, kanë krijuar rrezik për drejtuesit e mjeteve, punonjësit e transportit publik dhe pasagjerët. Për këtë arsye, është vendosur ndërprerja e shërbimit deri në një moment të dytë.
Pezullimi do të vijojë deri në momentin kur të mos ketë më rrezik për sigurinë e mjeteve dhe personelit të transportit urban. Deri atëherë, qytetarët që përdorin linjat urbane në Tiranë dhe Kamëz do të duhet të përballen me ndërprerjen e përkohshme të shërbimit.
Kryetari i Shoqatës Kombëtare të Transportit Qytetas, Kostandin Foni, bën me dije se, përveç ndërprerjeve të shërbimit dhe pamundësisë për realizimin e kilometrave të planifikuara, gjatë protestave janë shkaktuar edhe dëme materiale në mjetet e transportit publik. Sipas vlerësimeve paraprake, deri në këto momente, dëmet e shkaktuara në flotën e autobusëve përllogariten në rreth 2 milionë lekë. Kjo vlerë mbetet ende në proces evidentimi dhe verifikimi, ndaj shuma përfundimtare mund të ndryshojë në varësi të konstatimit të plotë të dëmtimeve.