Autoriteti Rrugor Shqiptar me në krye Ergys Verdhon është një nga institucionet për të cilin kompanitë ankohen më shumë në Komisionin e Prokurimit Publik.
Madje, shpeshherë ka qenë KPP ai që ka detyruar Verdhon të anulojë vendimet e marra pasi në to janë konstatuar parregullësi.
Një rast i tillë është edhe tenderi për Ndërtimin e Rrugës Kardhiq–Delvinë për Lotin e 7 me fond limit 2.3 miliardë lekë.
Për procedurën kanë shfaqur interes 6 kompani, pesë prej të cilave ARRSH i ka skualifikuar duke lënë në garë vetëm bashkimin e operatorëve “Ircop” S.p.a., “Sulova Ndërtim Prodhim”, ”Vega” & “A&E Engineering”me ofertën më të lartë.
Pas këtij vendimi “Gjoka Konstruksion”, “Cobial” sh.p.k., “JV “GR Albania” sh.p.k. & “Geoportal” me ofertën më të ulët kanë paraqitur ankesë duke kundërshtuar skualifikimin për dokumentacion jo të plotë dhe të saktë.
Madje, ata pretendojnë se koha e marrë në dispozion nga institucionin që drejton Verdho për vlerësimin e ofertave është e pamjaftueshme.
“Të 5 ofertuesit e skualifikuar janë bashkime operatorësh që do të thotë një volum i madh dokumentacioni për vlerësim përveç dokumentacionit të ofertuesit të kualifikuar. Brenda afatit 3 ditor të kryerjes së vlerësimit kemi bindjen se Autoriteti Kontraktor nuk ka kryer asnjë verifikim të dokumentacionit të paraqitur.”
Sërish, ARRSH ka kundërshtuar këto pretendime duke e detyruar subjektin ankimues t’i drejtohet KPP-së, i cili ka arritur në përfundim të ndryshëm.
“Autoriteti kontraktor në arsyen e skualifikimit të dhënë në sistemin e prokurimit publik, përveç faktit që vlerëson mbi një kriter të pakërkuar, ka dhënë një arsye skualifikimi të përgjithshme, të pa specifikuar dhe të padetajuar.”
Prandaj, ka kërkuar kualifikimin e kësaj kompanie, e cila më pas është shpallur dhe fituesja.
Fituesi i zgjedhur nga Verdho kishte ofertuar rreth 509 milionë lekë të reja pa TVSH më shumë se sa subjekti që ka bërë ankesën. /Ora News