Kryeministri Edi Rama u është përgjigjur edhe ditën e sotme komentuesve në rrjetet sociale, në rubrikën e tij “Sy m’sy”.
Në përgjigjje të një qytetari, Rama ka thënë se e respekton SPAK-un dhe kreun e saj, Altin Dumanin.
Rama kujtoi se në kohën kur qeveriste Berisha, shpatën e ndëshkimit e mbante ai, ndryshe nga sot, kur pushtetet janë të ndara.
“Altin Dumani, për të cilin kam shumë respekt dhe kam shprehur publikisht solidaritetin përballë të gjithë qenërisë, që sot u turret për ta vënë nën presion, ka qenë aty por nuk ka pasur këtë fuqinë që ata kanë sot, se shpatën e ndëshkimit e mbante kush rrinte në këtë zyrë, dhe e përdorte për hesapet e pushtetit të vet. Shpatën e ndëshkimit e mbante pushteti ekzekutiv. Unë dorëzova shpatën për të bërë këtë që po bëjnë se kjo është e vetmja rrugë”, tha Rama.
“Imagjino të mblidhet poshtë dritares time një popull i tërë dhe të jepej urdhri për të qëlluar me plumba të vërtetë në mish njerëzit e të vdisnin. U prehshin në paqe, 4 vetë totalisht të pafajshëm e të parrezikshëm. Dhe prokurori të lëshonte urdhra arresti për një numër personash përgjegjës për procesin e administrimit të protestës, dhe unë t’i jepja urdhër drejtorit të policisë që t’i thoshte SPAK, ec, asnjë nuk arrestohet. Pra me forcën e policisë të merrja në mbrojtje persona që i kërkon SPAK. Kjo ka ndodhur në Shqipëri jo para 100 vitesh por shumë pak kohë më parë, para se unë të vija në këtë zyrë. Kush e bëri? Na ra nga qielli apo e solli Amerikan me aeroplan dhe Europa me vapor”, shtoi më tej Rama.