Presidenti francez, Emanuel Macron, dhe kancelarja në largim e Gjermanisë, Angela Merkel, ndanë një përqafim lamtumire të mërkurën, pasi ai e nderoi me çmimin më të lartë në vend, Kryqin e Madh të Legjionit të Nderit.
Në vend të një darke shtetërore në pallatin presidencial të Elizesë në Paris, ku Merkel ka njohur 4 presidentë francezë, Macron e ftoi kancelaren në qytezën mesjetare të Bon, në rajonin e njohur për prodhimin e verës të Borgonjës.
Macron dhe bashkëshortja e tij Brigit shoqëruan Merkel dhe bashkëshortin Joachim me një tur në Hospice de Beaune, një ndërtesë e shekullit të 15 që ka shërbyer si spital për të varfrit e ku tani zhvillohet një ankand vjetor verërash.
Të dy mbështetës të integrimit europian, Macron dhe Merkel kanë punuar ngushtë gjatë krizës së Covid-19, edhe pse nuk u konsideruan kurrë aq të afërt sa Merkel dhe konservatori Nikolas Sarkozi, president nga viti 2007 deri në 2012. Bashkëpunimi i tyre gjatë krizës së euros, fitoi epitetin, Merkozy.