3 ditë kanë kaluar nga maskara në Velipojë, që për 50 metra hapësirë për vendosjen e shezlongëve u vranë 4 persona. Sipas të dhënave të ekspetizës së policisë, del që Hasan Ferracaku vrau vëllezërit Gocaj dhe kamarierin 19-vjeçar, Musaen Zeneli. Hasan Ferracaku mbeti i plagosur dhe ndodhet nën arrest në kushtet e spitalit. 22 gëzhoja armësh janë gjendur në vendin e ngjarjes. 8 gëzhoja armë zjarri pistolete, 5 gëzhoja armë zjarri automatiku, 5 gëzhoja arme zjarri pistolete dhe 1 fishek armë zjarri pistoletë me kapsollë të pagoditur si dhe 3 prella arme zjarri të dëmtuara pjesërisht.
”Shqiptarja.com”, shkruan se sipas grupit hetimor në drejtim të Edmond Gocaj ka qëlluar Hasan Ferracaku, me armë zjarri pistoletë, duke e lënë të vdekur në vend, ndërkohë që më pas vëllai i tij Xhovani Gocaj i cili ka qënë disa metra më tutje, ka qëlluar në drejtim të Kujtim Ferracakut, duke e lënë të vdekur dhe plagosi edhe Hasan Ferracakun dhe Elmelind Dylin nipin e viktimës.
Ndërkohë që pavarësisht se Hasan Ferracaku ka marrë plagë në njërën dorë, ai ka qëlluar edhe në drejtim të Xhovan Gocaj dhe kamarierit 19 vjeçar. Në vendin e ngjarjes janë sekuestruar dy armë zjarri pistoletë, njera e llojit TT, dhe një tjetër miniglok e cila është gjetur në tarracën e hotelit Gocaj ku ka ndodhur ngjarja. Policia ende nuk ka sekuestruar armën e zjarrit automatik e cila është përdorur në vendin e ngjarjes.
Dy ditë më parë doli edhe dëshmia e tij. Hasan Ferracaku ka rrëfyer se në hotelin e familjes Gocaj kishin shkuar për t’u sqaruar dhe për të gjetur një zgjidhje në lidhje me vendosjen e shezlongeve në plazh. Sipas tij, ata i kishin kërkuar familjes Gocaj që të largonin shezlonget nga ajo zonë e plazhit, pasi këtë vit e kishin ata të drejtën pasi kishin aplikuar, por sipas tij Gocajt nuk pranuan duke kërkuar që të prisnin deri në përcaktimin e vendit të tyre. Debati më pas është acaruar, duke shkuar deri në përdorimin e armëve. Hasan Ferracaku thotë se kanë qenë Gocajt ata që kanë qëlluar fillimisht dhe se më pas, vëllai i tij, Kujtim Ferracaku, i cili mbeti i vrarë, është kundërpërgjigjur për vetëmbrojtje.
”Fillimisht kemi zhvilluar një debat tek shezlonget në plazh sepse ata i kanë vendosur në vendin ku këtë vit e kemi pasur të drejtën ne pas aplikimit që kemi bërë. Pas atij debati kemi shkuar në darkë tek hoteli Gocaj për t’u sqaruar me familjen Gocaj. Jemi ulur në tavolinë për të biseduar. Ne i kemi thënë që të gjejmë një marrëveshje, pasi ata i kishin vendosur më përpara shezllonet njëkohë që këtë vit kjo e drejtë ishte e jona në baze të aplikimeve. Ata nuk kanë pranuar duke thënë se duhet të presin derisa të përcaktohet edhe vendi i tyre. Gjatë bisedës ka nisur debati dhe gjërat janë acaruar duke bërë që të përdoren edhe armët. Ne kemi shkuar për të folur dhe për të gjetur një zgjidhje për shezllonet, por situata u acarua dhe pas krismave të armëve nuk e di çfarë ka ndodhur më. Di që ata kanë qëlluar ndaj vëllait dhe ne të tjerëve dhe në atë moment vëllai është vetëmbrojtur. Unë nuk kam qëlluar dhe kemi shkuar vetëm për të biseduar sepse janë njerëz që ne i kemi njohur dhe kemi pasur marrëdhënie të mira, por situata doli nga kontrolli”, mësohet të ketë thënë Ferracaku.