Komisioneri i Bashkimit Evropian për Demokracinë, Drejtësinë dhe Shtetin e së Drejtës, Michael McGrath, ka vlerësuar rolin e Prokurorisë së Posaçme (SPAK) në luftën kundër korrupsionit të nivelit të lartë dhe krimit të organizuar në Shqipëri. Ai ka theksuar rëndësinë e mbështetjes institucionale dhe politike për punën e kësaj strukture, si dhe nevojën për t’i siguruar burimet dhe kompetencat e nevojshme për përmbushjen e detyrave të saj.
Sipas McGrath, SPAK përballet me sfida të rëndësishme në hetimin e çështjeve që lidhen me korrupsionin dhe krimin e organizuar. Për këtë arsye, ai e konsideron thelbësore mbështetjen nga të gjitha institucionet publike, aktorët politikë dhe qytetarët.
Komisioneri nënvizoi se lufta kundër korrupsionit kërkon jo vetëm angazhim institucional, por edhe burime të mjaftueshme për të hetuar dhe përballuar personat e përfshirë në veprimtari kriminale. Ai theksoi se korrupsioni nuk është një krim pa viktima, pasi cenon drejtpërdrejt interesin publik dhe ndikon në cilësinë e shërbimeve që u ofrohen qytetarëve.
Sipas tij, fondet publike që shpërdorohen përmes korrupsionit mund të përdoreshin për përmirësimin e shërbimeve publike dhe përmbushjen e nevojave të komunitetit. Për këtë arsye, mbështetja publike dhe politike për SPAK-un mbetet një element i rëndësishëm në forcimin e luftës kundër këtij fenomeni.
McGrath u shpreh gjithashtu se pret përparim të mëtejshëm në rezultatet e hetimeve, ndjekjeve penale dhe dënimeve për rastet e korrupsionit të nivelit të lartë dhe krimit të organizuar.
Megjithatë, ai theksoi se korrupsioni duhet të luftohet në çdo nivel, duke nënvizuar rëndësinë e rolit të strukturave të tjera të prokurorisë në Shqipëri. Njëkohësisht, sipas tij, nevojitet trajtimi i shkaqeve që favorizojnë korrupsionin dhe vendosja e mekanizmave të përshtatshëm mbrojtës në të gjitha nivelet e administratës dhe institucioneve publike.