Ministri i Turizmit, Kulturës dhe Sportit, Blendi Gonxhja thotë se kontrollet përgjatë vijës bregdetare nga Durrësi në Kavajë vijojnë me intensitet, me fokus respektimin e rregullave për administrimin e stacioneve të plazhit dhe mbrojtjen e hapësirave publike.
Gonxhja tha se inspektorët e Agjencisë Kombëtare të Bregdetit (AKB) janë të angazhuar në verifikimin e zbatimit të kontratave, respektimin e sipërfaqeve të miratuara dhe të rregullores në fuqi, me qëllim garantimin e aksesit të lirë të qytetarëve dhe pushuesve në plazhet publike.
Ministri u bëri thirrje të gjithë subjekteve dhe operatorëve që ushtrojnë aktivitet në bregdet të respektojnë detyrimet ligjore dhe kushtet e kontratave, duke mos cenuar hapësirat publike. “Për çdo shkelje do të zbatohet legjislacioni në fuqi, me zero tolerancë ndaj çdo cenimi të të drejtave të komuniteteve dhe të frekuentuesve”, theksoi Gonxhja.
Gonxhja nënvizoi se respektimi i rregullave është një detyrim ligjor, ndërsa mbrojtja e hapësirave publike në plazhe mbetet një prioritet dhe interes i përbashkët për qytetarët dhe zhvillimin e qëndrueshëm të turizmit.