Ministri i Jashtëm iranian, Abbas Araghchi ka paralajmëruar për “pasoja të përjetshme” pas sulmeve amerikane ndaj objekteve bërthamore iraniane.
“Ngjarjet e këtij mëngjesi janë të shëmtuara dhe do të kenë pasoja të përjetshme”, shkroi Araghchi në një postim në X.
Presidenti i SHBA-së, Donald Trump, njoftoi në mbrëmje se avionët amerikanë kishin kryer sulme ndaj tre objekteve bërthamore iraniane, përfshirë vendin nëntokësor të pasurimit të uraniumit “Fordow”.
Araghchi akuzoi SHBA-në për kryerjen e një “shkeljeje të rëndë” të Kartës së OKB-së, ligjit ndërkombëtar dhe Traktatit të Mospërhapjes Bërthamore (NPT) duke sulmuar atë që ai e përshkroi si “instalime bërthamore paqësore”.
“Çdo anëtar i OKB-së duhet të alarmohet për këtë sjellje jashtëzakonisht të rrezikshme, të paligjshme dhe kriminale”, tha diplomati më i lartë i Iranit.
“Në përputhje me Kartën e OKB-së dhe dispozitat e saj që lejojnë një përgjigje legjitime në vetëmbrojtje, Irani ruan të gjitha opsionet për të mbrojtur sovranitetin, interesin dhe popullin e tij”, shtoi ai.
Presidenti i SHBA-së, Donald Trump kërcënoi Iranin me sulme të mëtejshme nëse Teherani nuk kërkonte paqe, pas një sulmi ndaj objekteve bërthamore në vend.
“Ose do të ketë paqe, ose do të ketë tragjedi për Iranin shumë më të madhe se ajo që kemi parë gjatë tetë ditëve të fundit”, tha Trump në një fjalim drejtuar kombit nga Shtëpia e Bardhë.
“Mos harroni, kanë mbetur shumë objektiva”, shtoi presidenti i SHBA-së.
Trump tha se sulmet amerikane kishin shkatërruar plotësisht objektet kryesore të pasurimit bërthamor të Teheranit.
“Irani tani duhet të bëjë paqe. Nëse nuk e bën, sulmet e ardhshme do të jenë shumë më të mëdha”, theksoi presidenti i SHBA-së.
Izraeli nisi fushatën ushtarake më 13 qershor, duke thënë se synonte të parandalonte Iranin nga ndërtimi i një arme bërthamore – një akuzë që Teherani e ka mohuar vazhdimisht, duke thënë se programi i tij bërthamor shërbente vetëm për qëllime civile.